Online Reporter
Ethel Ncube
I-Zimbabwe National Family Planning Council (ZNFPC) iqhuba umkhankaso wokukhuphula ukusetshenziswa kwe-Sayana Press, okuyijekiseni entsha yokuvikela ukuzithwala kunye lokunika amandla abesifazana kumpilakahle yabo yokuzithwala.
Kumhlangano wokufundisa ngeSayana Press obusemawofisini kaHulumende eMhlahlandlela, koBulawayo ngoLwesithathu, izisebenzi zezempilakahle, abanye abathintekayo kunye lentathelizindaba bezifundiswa ngendlela ezingenza abesifazana bakhethe ukusebenzisa indlela le yokuvikela ukuzithwala.
I-Sayana Press yindlela yokuvikela ukuzithwala yokuhlaba ijekiseni esebenzisa inalithi encinyane, futhi umuntu angazihlaba yena yedwa ngaphansi kwejwabu lakhe ngemva kwenyanga ezintathu.
Ijekiseni le yindlela ephephileyo futhi esebenzayo yokuzinakekela njalo ilungele abesifazana abaleminyaka ephakathi kwengu-15 kusiya ku -49.
U-ZNFPC Service Delivery Coordinator uNkosikazi Janet Godzi uthe idolobho lakoBulawayo ngelinye lamadolobho lapho ijekiseni le eyaqala ukubakhona.
“ISayana press yijekiseni ehlatshwa ngaphansi kwejwabu. Ihlatshwa ngemva kwenyanga ezintathu. Ungayihlatshwa kusasele iviki eyodwa ukuthi iphele emzimbeni kumbe ngemva kweviki iphele emzimbeni,” kuchasisa uGodzi.
UNkkz Godzi uthe abanye abesifazana bazithwala ngesizatho sokuba bayabe bengelamali zokuya ezibhedlela ukuze bayehlatshwa ijekiseni kukanti abanye bahlala khatshana lezibhedlela kungakho le indlela izakuba lusizo kwabanengi.
“Ukuhamba ngokunye okuhlupha abesifazana kungakho iSayana Press le izancedisa omama akade behlutshwa ngumango kunye lendleko zokuhamba.
“Ijekiseni le ungahamba uyehlatshwa umongikazi uhle akutshengise indlela okumele uzihlabe ngayo abesekupha enye eyokuthi uyezihlaba ngemva kwenyanga ezintathu ngekhaya.”
Uthe ekuzihlabeni kumele uzihlabe endaweni ezilamafutha ezifana langemva kwengalo, emlenzeni kumbe esiswini khatshana lemithambo.
UMnumzana Mission Gwafa ongu-ZNFPC Marketing and Communications Officer uthe ijekiseni yokuvikela ukuzithwala le, ilungele abesifazana bonke kungakhathalekile ukuthi baphila lobugoga kumbe njalo bathatha amanye amaphilisi loba kungawokucindezela ukumemetheka kwegcikwane leHIV emzimbeni ama-ARVs.
“Ijekiseni le akukho ekuphambanisayo emzimbeni wakho, nxa kulamanye amaphilisi owanathayo ungaqhubeka nje uzinathela iyafana nje lamaye amajekiseni anjengaboDepo.
“Leli lilungelo lomuntu wonke lokuhlela imuli. Singobani thina ukuthi lo sesimethesa umthwalo omkhulu? Labo balelungelo lokuthi bancediswe ngabezempilakahle,” kutsho uMnu Gwafa.
Uphethe ngokukhuthaza abesilisa kunye lenkokheli zomdabu ukuthi basekele abesifazana ekusebenziseni indlela zokuhlela izimuli ngoba eminye imikhuba elandelwayo yiyo ebangela ukuthi abantu bangasebenzisi indlela zokuhlela izimuli. Ukuhlatshwa i-Sayana Press kuphakathi kwe-US$1 le US$2 ukuyihlaba ezibhedlela zikaHulumende kunye lemakilinika.
