Online Reporter
Ethel Ncube
ABE-Veterinary Services sebekhuthaze uzulu ogcine izinja ukuba abone ukuba izinja zakhe ziyahlatshwa amajekiseni afaneleyo ukuze zivikeleke kumikhuhlane etshiyeneyo.
Udokotela Elias Shumba ubike ukuba ukuhlabisa izinja kuqakathekile ngoba kuyazivikela kumikhuhlane eminengi kugoqela owobhova okungumkhuhlane ongathelelwa abantu nxa inja yakhona ingabaluma.
Ekhuluma lentatheli, uDkt Elias Shumba ubike ukuba wonke umuntu ogcina inja kungakhathekile ukuba kungaphi kumele ayihlabise ijekiseni.
“Okokuqala, kumele sithenge amabhuku ezinja esingahamba lawo nxa sisiyazihlabisa. Ibhuku leli kumele ligcinwe kuhle ukwenzela ukuthi nxa kungenzakala inja yakho ilume umuntu ubekwazi ukulikhipha utshengisa amapholisa ukuba inja yakho yahlatshwa amajekiseni enela.
“Kulabo abahlala emadolobheni sijayele ukuba lamalanga okubhoda sihamba lemithi yethu sihlaba izinja, okwakho kuphela yikuletha inja yakho lebhuku ithole ijekiseni.
“Okumele ukwenze yikuya emawofisini eVeterinary aseduze lawe uyekuzwa amalanga esizabe sibhoda ngawo emalokitshini,” kubika uDkt Shumba.
Uqhubekele phambili eveza ukuba abasemakhaya labo kumele babone ukuba izinja zabo ziyahlatshwa.
“Abasemaphandleni lani lilomlandu wokuba libone ukuba liyahamba emawofisini eVeterinary aseduze lani liyehlabisa izinja zenu lemidlwane layo nxa isilenyanga kuyamele ithwalwe layo iyethola amajekiseni ukuze ivikeleke kumikhuhlane eminengi.
“Ngithanda ukukhuthaza bonke abagcine izinja ukuba balandele lokhu engikhulume ngakho ukuze basizakale njalo kungabilomuntu ozangena emanyaleni ngoba izinja zakhe sezilume umuntu ngapha zivele zingahlatshwanga,” kuphetha uDkt Shumba.
