admin
Njengoba nje kusaziwa ukuthi amanzi kawalweqi udonga kunjalo ke lakuphephandaba likazulu elaziwa ngezimnandi lalo kalideli ukuphathela uMthwakazi ezimnandi maviki onke. Namhlanje lize lejaha leTsholotsho elenza into yamehlo ku-Benaroo Music Style. Kaliculi nje lelijaha lenza kodwa bakwethu.
Angithi nje ijaha leli elize loMthunywa nje nguBenson Jiyane owaziwa ngokuthi ngu Benaro The Great Scorpion.
Ofisa ukuzwa mayelana lalelijaha elibanzi kaphatheke kule ingxoxo enambithekayo, phakathi kwentatheli yephephandaba likaZulu uCornelius Luphahla (CL) lendodamdabuko le uBenson Jiyane (BJ).
CL: Tshela uzulu jahelibanzi mayelana lembali yakho kanye lokuthi waqala nini ezomculo?
BJ: Mina ngazalwa mhlaka 2 Mbimbitho ngomnyaka ka 1991 esibhedlela seTsholotsho. Kwathi ngomnyaka ka-1997 ngayangena uGiredi 1 eMandana Primary School eTsholotsho ngaze ngayaqeda uGiredi 7 ngo2003.
Kwathi ngo-2004 ngayangena uFomu 1 eTsholotsho High School ngayaqeda uFomu 4 ngo 2007. Ngaqhubekela phambili njalo ngezifundo zami ngoba kwathi ngo2009 ngayangena uFomu 5 esikolo seMethodist esiseMakokoba koBulawayo ngayaqeda ngo2010.
Ngakho-ke ezokucula ngaziqala ngisasemncinyane noma nje ngangikaziwa ngabantu. Ngo-2008 ngacula leqembu lembube elalithiwa zinduna zeZhwane okuyikho esasungula khona igama elithi Zhwane eselichaza iTsholotsho.
Okwami ke ukucula ngedwa ngakuqala ngo-2010 ngisacula imihlobo yemiculo etshiyeneyo ngaze ngazosungula ke iBenaroo Music Style.
CL: Akutsho mfokaJiyane ukuba njengomculi kungani wahlabela umhlobo womculo ongaziwayo ukhuluma kakhulu ngezothando njalo sulamadlalade amangaki?
BJ: Okwenza ngasungula umculo lo ongaziwayo ngangijonge ukuveza isiphiwo sami kwezomculo njalo ngangithandi ukuhlabela umculo owasungulwa ngabanye yikho ngazisungulela owami. Umculo lo ugoqela umaskandi, ipansula kanye lomculo kaJays kwasokuphuma iBenaroo Music Style. Ngakho-ke okwenza ngathanda ukucula ngezothando yikuthi ngananzelela ukuthi inengi labantu kulezinsuku kalisathembekanga kwezothando ngakho yikho ngicula ngikhuthaza abantu ukuba baphathane kuhle emizini yabo babuye bathembakale.
Njengomculi osacathula okwakhathesi sengakhipha amadlalade amabili. Elakuqala ngalikhipha ngo-2012 elithi Siyafana kwathi lonyaka ngo-2016 ngakhipha njalo elinye elithi Thandy Come Duze.
CL: Jaha leZhwane umphakathi uthanda ukwazi ukuthi wandise ukuculela ngaphi umculo wakho?
BJ: Mina ngandise ukuculela eTrade Fair, emitshadweni, emidlalweni yamadili okuzalwa kanye lalapho okufikela khona izethekeli ezivela kwamanye amazwe. Kwesinye isikhathi ngangenze ama-shows endaweni ezehlukeneyo okuyikho lapho abantu abanengi abazwela khona umculo wami.
CL: Ngaphandle kokucula msebenzi bani owenzayo njalo ukhangelele ukwenzani lonyaka?
BJ: Omunye umsebenzi engiwenzayo yikuthi ngingu-private tutor ngakho ngandise ukusebenzela elokitshini leMganwini. Ngakho-ke lonyaka njengomculi ngikhangelele ukuvakatshela abantu endaweni ezehlukeneyo ngibenzela ama-shows ukuze umculo wami bawazi. Okunye njalo ngikhangelele ukuba ekupheleni komnyaka ngikhuphe njalo elinye idlalade elizajabulisa abantu okwamagama.
CL: Akuchazele uZulu ukuba bunzima bani oyake uhlangane labo njengomculi njalo abantu bathini ngamculo wakho?
BJ: Njengomculi ocula umculo omutsha ubunzima engangihlangana labo yikuthi abantu babengathi kabawuzwisisi umculo wami. Okunye njalo ngangikhathazwa luhlupho lwemali ukuze ngikhiphe idlalade njengoba ngicula ngingedwa kwakudingeka ukuba ngizikhiphele ngdwa imali le.
Okwakhathesi abantu bayawujabulela umculo wami njalo bangikhuthaza ukuthi ngiqhubekele phambili ngicula ngingakhathali noma ngihlangana lobunzima kwezomculo.
CL: Nkuthazo bani oyipha abaculi abasacathulayo jahelibanzi?
BJ: Kubaculi abasacathula ngithi kababambelele emculweni bengadeli noma nje behlangana lobunzima ngoba nxa uqala ukucula kuvele kunzima. Okunye njalo ngithe kabaqine kakhulu ekwenzeni ama-shows ukuze babonakale emphakathini.
Online Reporter