admin
EKUKHULENI kwethu abazali yibo abasihlelela impilo zethu njalo yibo abalungisela ikusasa labantwana.
Njengabantwana sasiqakathekisa ukubana sihambe ezinyathelweni zabazali ezifana lokubana siqeqetshe ezifundweni zethu njalo sitshade ngokusemthethweni ukuze lathi abantwabethu babe lekusasa elihle njalo elihlelekileyo.
Izikhathi ezinengi abantwana bakhangela indlela abazali abayibo bona njalo kulula ukubana bafanisele izenzo zabazali babo. Kulezinye indlela abazali abaziphatha ngayo ecina isenza ukubana kubenzima ukuthi abantwana bathole amalungelo abo okwaziwa ngoba izihlobo kanye labosebele basuka baxabane bekhohlwe ukuba abantwana abalacala njalo abazi lutho. Inengi labobaba liyenza amaphutha asala esehlupha omama ngoba
izikhathi ezinengi bona bayabe bengasekho ukuze bancedise ekukhuliseni abantwana.
Izikhathi ezinengi abantwana izenzo zabo zithathela kubazali babo ngoba bekhula bebona bona. Nxa abazali belobudlwangundlwangu abantwana labo bandise ukulandela unyawo lwabazali.
Kule iviki ngithole ithuba lokuxoxisana lojaha okuthiwa nguFarai. UFarai wazalelwa eBikita. Unina loyise abazange bathathane ngenxa yokubana unina waye yisisebenzi sakoMoyo kodwa-ke wasesuka wathandana loMoyo onguye ubaba owayemqhatshile. UMoyo wayethethe elomkakhe okuthiwa nguRudo. URudo wathi lapho esethole ukubana umkakhe sephambanise isisebenzi sakhe bahle baphanga basixotsha. UNakaFarai wabeletha-ke uFarai wamtshiya kumuli kaMoyo. UFarai wakhula wathathelwa incwadi yokuzalwa ngumkaMoyo onguye owayesemthethweni.
UFarai wakhula-ke ehlala loyise kodwa engazi ukuthi unina wokumzala wayangaphi. Waphathwa luklubhu ngunina wakhe omncane waze wabaleka ngakibo wayahlala esitaladeni njengesibhonda. Ekubalekeni kwakhe wahamba lencwadi yakhe yokuzalwa kodwa yasuka yanethwa yadabuka wacina laye eseyilahla njengoba inengi labantwana kalikwazi ukubana incwadi yokuzalwa isebenzani njalo iqakatheke ngani.
UFarai weza-ke eTrinity Project ukubana simsize ngokubana angathola njani incwadi yakhe yokuzalwa. Okokuqala kumele uFarai abuyele esikolo lapho afunda khona ukuze ayedinga i-birth entry number. Nxa engazithola lezo inombolo kumele azithathe aqonde lazo emahofisini akoMsitheli ayekhuluma ukubana walahla incwadi yokuzalwa njalo abhadale imali engange $5. Lapho ke emahofisini bazamtshela ukubana izaphuma nini kodwa kakuthathi malanga mangaki ukubana iphume. Emva kwalokhu uzakuya emapholiseni ayekhuluma ukubana walahla isithupha abesebhala i-affidavit azayidindisa emapholiseni. Incwadi le uzaqonda layo emahofisini lapho okuthathelwa khona incwadi zokuzalwa kanye lezithupha, uzabhadala imali engange $10. Emva kwalokho sengathatha iphasipoti laye aqhube impilo yakhe ngendlela afisa ngayo.
Kasihlanganeni njalo kuviki elizayo.
Umlobi utholakala kukheli ethi [email protected] loba kunombolo ezithi 0773195055.
Online Reporter