adminMsilisi Dube
INHLANGANISO ecubungulisisa ngezezilimo kunye lezifuyo eyeMatopos Research ikhuthaza abalimi beMatabeleland ukuthi bafuye izifuyo ezitshiyeneyo njalo balime lezilimo ukwenzela ukuthi nxa izulu lingananga kuhle benelise ukuphephela ezifuyweni.
Kubikwa abalimi abanengi balumango bavame ukufuya izifuyo ezigoqela imbuzi, inkomo, izimvu kunye lamadada bekele ukulima izilimo okucina kudala ukuthi bebulawe yindlala.
Ekhuluma loMthunywa, uNkosikazi Trinity Ndlovu ongumaqhuzu wenhlanganiso le, uthe abalimi akumelanga bagxile ekugcineni izifuyo kuphela kodwa kumele balime futhi ukuze bengabulawa yindlala.
“Abalimi abanengi ikakhulu abavela endaweni ezinjengeBinga kunye lezinye indawo ezithola izulu elincane bafuya imbuzi kunye lezimvu kuphela. Abalimi laba kabalimi bayabe bethembele ezifuyweni kuphela. Lokhu kuyingozi ngoba izifuyo lezi zingafa umlimi ulakho ukubulawa yindlala.
“Umlimi ohlakaniphileyo kumele ahlanganise izifuyo lezilimo ukwenzela ukuba nxa izilimo zingekela ukuvuthwa aphephele ezifuyweni. Izifuyo zilakho ukuphila lanxa kungelamadlelo ngoba umlimi olemali ulakho ukuzithengela ukudla kokuzinonisa,” kuchaza uNkkz Ndlovu.
UNkkz Ndlovu uthe ukuguquka komumo womkhathi yikho okubangela ukusweleka kwamadlelo ngoba isikhathi sokuna kwezulu sesaguquka.
“Abalimi yibo abengezelela ukuba umumo womkhathi uguquke masinya. Uthola begamula izihlahla mahlayana bebuye betshise amathaya lezinye izinto eziphambanisa umkhathi. Inthuthu le iyaphazamisa umkhathi izulu licine lingasani ngendlela efaneleyo.
“Abalimi kumele babiyele amasimu abo ngocingo njalo bengahuduli izileyi ngoba zonke lezi zinto zibangela ukugugudeka komhlabathi. Abalimi kumele nxa izulu lingana bavune amanzi ngoba izulu lingathengwa. Lilakho ukuna kanye lingasaphindi line futhi okuyinto engabulalisa abalimi ngendlela,” kuphetha uNkkz Ndlovu.
Online Reporter