adminCornelius Luphahla
ABADALA bathi okukhulu akulamkhosi kodwa lokhu esikubona ngawethu la kukhulu njalo kuyababazisa Mthwakazi kaNdaba. Angazi ukuthi yiphi le mpukane esiwone loluchago olunguMthwakazi obeluhlotshiswe ngenhlonipho, ubuntu kanye lokuthula.
Ngikhuluma nje ukubanjwa iganyavu kwabantwana abancane sokuyinsakamvukela umchilo wesidwaba.Ekadeni lokhu bekungabonwa kufaniswa lenhlaka yotshani. Angithi lekadeni bekuthiwa inkukhu enatha amaqanda ayo itshiswa umlomo kumbe ibulawe okutshengisa ukuthi bekungafuneki. Khathesi umzali sekhangwa yibuhle bomntanakhe aze afise ukwembatha laye. Nansi isizwe sikaMthwakazi sivuka ubunke simila amahlwayi libalele.
Isimanga yikuthi abantu babulalana kusa kwamalanga okwenkukhu zifela abantu bemzini ebusika. Isineke lesihelo asisekho emuntwini, abantu sebaphenduka inyoka eluma itshiye ingeke yadla lutho.
Intsha yalamuhla yenza izimanga angazi ukuthi seyangenwa yini. Uthola umntwana oyintombazana egqoke isiketi esiphelela enhla yamadolo okokuthi nxa ungakhangelisisa ingasese yonke iyabe isegcekeni khonapho yena uyabe ezihambela cala celeni ethi luhlobo lwefeshini.
Mthwakazi omuhle yazi ukuthi ukugqoka impahla ezivala amathangazi akutsho ukuthi umuntu kayazi ifeshini njalo uphansi kodwa kuveza ukuzigqaja ngomzimba wakho kanye lobuzwe bakho. Ayisikho njalo ukuthi intombazana egqoke impahla ezifihla ubunqunu bayo kayibonwa ngamajaha kodwa isuka ibe lesithunzi okokuthi inengi lamajaha afuna ukudlala ngamantombazana asuka ayesabe.
Kulezinsuku inengi lamajaha lijonge ukudlala ngamantombazana.
Umbhalo egwalweni lukaMathewu uchaza ukuthi ensukwini zokucina kuzagcwala amanyala encithakalo, nanku sikubona ngamehlo. Khathesi kusegcekeni ukuthi ithunga selidumela emansumpeni.
Amajaha alezinsuku awasakwazi ukuthi ukuba lijaha kutshoni lokuthi kufanele baziphathe njani. Uthola ijaha lilaxuzela lingasazazi liphethe imbodlela yotshwala lithandelene lenkalakatha yesalukazi esingasela lamazinyo lithi ngusomoya walo. Lenzenje aligqize qhakala emphakathini icala kaliliboni lilizwela kubafana bembuzi.
Mthwakazi kaNdaba angitsho ukuthi amajaha enganathi utshwala njalo angitsho ukuthi lingazithozisi kodwa ngizama ukulixwayisa ukuthi liboziphatha kahle njalo lizigqaje ngemizimba yenu. Dingani osowenu lekelane lezalukazi zizikholisele lamaxhegu azo zikhumbule kudala zisakhula.
Ekadeni wonke umuntu omdala ubehlonitshwa ephathwa njengomzali nguye wonke umntwana kodwa khathesi ngilokudana okukhulu ngesenzo esenziwa ngontanga kubazali babo, kusobala ukuthi imbiza le sihuba sakutsha.
Isimanga yikuthi izigigaba lezi sezisenziwa langababalisi kanye labaphathi bezikolo. Uthola kuthiwa umphathisikolo umithise umntwana wesikolo olingana lecinathunjana lakhe. Asazi kumbe lakho sokuyiyo ifeshini leyo eyafikayo Mthwakazi.
Guqukani bakaMthwakazi likhumbule indlela okhokho benu ababephila ngayo lihloniphane njalo lizihloniphe. Ngilethemba lokuthi impilo ingabamnandi kudelwe kubuswe njengayizolo.
Online Reporter