adminMalven Mugadzikwa
MAPURISA eZimbabwe Republic Police (ZRP) ari kuyambira vanhukadzi vanoita zvekutengesa pamusika, kunyanya muHarare, kuti vangwarire varume vanovanyengedza vachiita sevanoda kutenga, vozoenda navo kunzvimbo dzakahwanda uko vanopedzisira vavabata chibharo.
Mutauriri wemapurisa mudunhu reHarare, Inspector Tarirai Dube, vakapa yambiro iyi svondo rapera apo mapurisa echidzimai akaita chirongwa chekuchenesa nekutsvaira musha weGlen Norah, muHarare vakabatana nesangano remadzimai akabva kumakereke akasiyana, reDaughters of Virtue.
“Pakutsvaira marara nemamwe madzimai kwatiri kuita, tiri kudawo kurwisana nerimwe rara rinonzi mhosva munharaunda dzedu. Madzimai — kunyanya vari mune zvekutengesa — ngavangwarire murume ari kufamba munzvimbo dzakasiyana-siyana muHarare, osvika pamadzimai anotengesa pamisika oti mukuru kubasa kwaanosevenza. Paanosvika pamunhukadzi anotengesa, anobva amuti ndiboss kubasa kwake anoda kutenga zvose zvaanenge achitengesa kuti anopa vaanoshanda navo,” vanodaro. Insp Dube vanoenderera mberi vachiti, “Murume uyu anobva avhevhetedza mudzimai anoita zvekutengesa uya kuti vaende vose netsoka kubasa kwake netunzira twekudimbudzira. Vava mutunzira twakavanzika twekudimbudzira, anomanikidza mukadzi uya kuenda pabonde naye omutorera zvose zvokutengesa.
“Imwe yenzvimbo yakazvakaitika izvi kuDzivarasekwa asi mupari wemhosva haasati abatwa uye hakuna ati ava kuziva zita rake. Mapurisa achiri kuferefeta nyaya iyi uye vanomuziva kana vanenge vamuona ngavazivise mapurisa ari pedyo navo.”
Mutauriri wesangano reDaughters of Virtue, Apostle Violet Kadzunge, vanotenda kubatana kwavakaita nemapurisa mukuchenesa Glen Norah.
“Kuchenesa kwatiri kuita nzvimbo ino kuri kufambidzana nekuparurwa kwakaitwa nemutungamiriri wenyika President Mnangagwa chirongwa chekuchenesa nharaunda dzatigere. Tatanga neGlen Norah nekuti ndiyo nzvimbo yatinonamatira asi tichasvika kunzvimbo dzakasiyana muHarare,” vanodaro.
President Mnangagwa vakatara Chishanu chekutanga kwemwedzi woga-woga kuti rive zuva rekuchenesa nharaunda munyika yose nechinangwa chekuti nzvimbo dzakasiyana dzigare dzakachena.
Online Reporter