daniel chigunwe
Kingstone Mapupu
MURUME wekuAthlone, kuGweru akabirwa motokari yake yerudzi rweHonda Fit iyo yaive pamba pake munguva dzemambakwedza.
Inspector Emmanuel Mahoko vanova mutauriri wemapurisa kudunhu reMidlands vanoti motokari iyi yakabiwa nemusi wa23 Kurume.
“Tafadzwa Makanyawu (34) akamisa Honda Fit yake ine nhamba dzinoti ACN 0612 nenguva dza2145 hours. Akasiya akiya madhoo emotokari yake ndokuenda kunorara. Mangwanani acho akatevera nenguva dza0450 hours, Makanyawu akazoona kuti motokari yake yaiva yabiwa apo gedhi repamba apa raiva rasiiwa rakavhurika,” vanodaro Insp Mahoko.
Vanoti vari kukumbira kuruzhinji kune vanoziva zvakaitika kuti vataurire mapurisa ari pedyo navo kuitira kuti vanhu vakaba motokari iyi vasungwe uye naiyowo igowanikwa.
“Tinokumbira kuruzhinji kune vane ruzivo nezvakaitika pakubiwa kwemotokari iyi vazivise mapurisa kuti makororo aya asungwe nekutiwo motokari iyi iwanikwe.
“Tinoshushikana nekuwanda kwenyaya dzekubiwa kwemotokari, zvikuru dzerudzi rweHonda Fit mudunhu redu reMidlands. Tinokurudzira vanhu kuti vaise ma’alarm’ padzimotokari dzavo nekugadzirawo magaraji ane masimbi uye nekupfuyawo imbwa pamisha senzira dzekuchengetedza midziyo yavo nemotokari kana kuisa varindi,” vanodaro Insp Mahoko.
Online Reporter