Online Reporter
Muchaneta Chimuka
HURUMENDE yeSouth Korea yakabatsira Zimbabwe nemari inosvika US$5 miriyoni kuburikidza neboka reKorea International Cooperation Agency (KOICA) iyo ichabatsaira zvakanyanya kutsigira zvirongwa zvemakore maviri zvekurwisa kusanduka kwemamiriro ekunze.
Zvirongwa izvi, izvo zviri kuitwa neHurumende yeZimbabwe yakabatana neUnicef, zvinosanganisira kusimudzira vechidiki vanobva kumhuri dzinotambura munyaya dzedzidzo neutano, pakati pezvimwe.
Vachitaura pachiitiko ichi paKuwadzana 3 High School muHarare svondo rino, gurukota rezvenharaunda, kusanduka kwemamiriro ekunze nemhuka – Dr Sithembiso Nyoni – vanoti vanotenda zvikuru Hurumende yeSouth Korea nerutsigiro urwu vachiti rwauya panguva iyo nyika iri kutambudzwa zvakanyanya nenyaya dzekusanduka kwemamiriro ekunze.
Kusanduka kwemamiriro ekunze uku kuri kuuya nenzira dzakadai sedutu remhepo rine simba rakanyanya, mvura yekunaya yakawandisa nekupisa kwakanyanya kana kutonhora kwakanyanya.
“Kusanduka kwemamiriro ekunze kuri kukanganisa zvikuru raramo yevechidiki apo vana vanokundikana kuenda kuchikoro nekuti bhiriji ravanoshandisa rinenge rayeredzwa nemvura kana kuti zvikoro zvadonhedzwa nedutu remhepo. Saka kuuya kwerutsigiro urwu kuchaita kuti tivake zvivakwa zvakasimba zvakadai sezvikoro zvakakwirira, mabhiriji ari mudenga nezvimwe zvinoita kuti vana vasarasikirwe nedzidzo yavo yakakosha. Tinoda kuti upenyu hwevanhu uye zvipfuyo huve hwakachengetedzeka,” vanodaro.
Vanoti rutsigiro urwu rwuri kutarisirwa kubatsira vanhu vakawanda munyika.
Mumiriri weSouth Korea muZimbabwe, Ambassador Park Kyung, vanoti chirongwa ichi chakakosha zvikuru nekuti chichabatsira mukuwaniswa kwechikafu, utano nedzidzo kunyanya yevana vanobva kumhuri dzinotambura.
Mai Etona Ekole vanove mumiririri weUnicef muZimbabwe vanotiwo panoda mushandirapamwe mukurwisa nyaya dzekusanduka kwemamiriro ekunze.
“Ramangwana redu riri mumaoko evechidiki saka zvakakosha kuti vawaniswe rutsigiro rwunoendeka. Dzidziso yakakosha maringe nekuchengetedzwa kwenharaunda uye kusimbaradzwa kwemitemo inotsigira nyaya idzi. Vechidiki vanofanira kudzidziswa nezvekukosha kwekuchengetedza mvura, kusanganisira zvirongwa zvekukohwa mvura nekuchengetedza nharaunda kuti igare yakachena,” vanodaro.
Zvakadai, South Korea iri kuita zvimwe zvirongwa muZimbabwe izvo zvinosanganisira kusimudzira mabhindauko ekuchengetwa kwehuku kumaruwa.
