admin
Nkosilathi Sibanda
UMQEQETSHI wamaWarriors uCallisto Pasuwa uthe akalandaba “lobudlwangudlwangu” obukhona kuZifa mayelana ngomsebenzi wakhe ngoba yena uhlose ukuphakamisa inkezo ye-African Nations Championships, (i-Chan).
UPasuwa uthe loba abadlali bakhe bencitshwe ithuba lokudlala okobungane lamanye amathimu, ulesiqiniseko sokuthi amazwe abaqala ukudlala lawo awasoke alibona kulumqhugelwano.
Amazwe azadlala leZimbabwe kusigaba sakuqala somncintiswano yiZambia, iMali leUganda. Umqhugelwano wenkezo yeChan udlalelwa yilabo abatshibilika kumaligi asemazweni eAfrica kuphela.
Imidlalo le iqala ngeSonto ezayo, isiyaphela mhlaka 7 kuNhlolanja.
UPasuwa uthe phakathi kwamazwe la, uyethuswa ngeleZambia ngoba lilabadlali abalobuciko benguqu njalo isizwe lesi kukhanya silolonge ngokupheleleyo.
Abafana beChipolopolo bangene enkambeni yokulolonga beseSouth Africa kusukela ngomnyaka ophelileyo.
“Okwenzakala emahofisini eZifa angifuni ukukhuluma ngakho. Amehlo ami akhangele kunkezo le esiyadlala kuyo.
Iphupho engilalo yikuthi sizayiphakamisa inkezo le, iZimbabwe ibonakale kumazwe alenguqu yaphezulu eAfrica.
“Kuqula lethu, ngibona angathi sizasebenza nzima ukuvala abadlali beZambia,” kutsho umqeqetshi lo kuliviki.
Kusukela ngoMvulo, amaWarriors kubikwa aqeqetshe ecatshile enkundleni yePHD Ministries eyenkonzo kamphurofethi uWalter Magaya.
AmaWarriors aqale ukulolongela umdlalo lo ngoLwesibili koBulawayo.
UPasuwa ukhulume lephephandaba likazulu ngesikhathi iqembu lithethe ikhefu lokunatha amanzi lapho abike esenkambeni yokulolonga ngoLwesibili ukuba lithuba lamaWarriors ukuthi abezingqwele zenguqu yeAfrica.
Isikhulumi seZifa uXolisani Gwesela uthe kungumbono weZifa ukuthi imidlalo yethimu yamaWarriors ibonakaliswe kumabonakude kaZBC.
Ngokunjalo, inkampani yomsakazo weZBC ithembise ukuthi yonke imidlalo yeChan izakhitshwa kumabonakude.
“Sithanda ukwazisa abathandi bomdlalo wenguqu izwe lonke ukuthi basekele ithimu yesizwe. Okuhle yikuthi imidlalo yethu izaphuma kumabonakude,” kuqhuba uGwesela.
Online Reporter