adminYiNtatheli kaMthunywa
UMGADLI weqembu leziqholo zeChicken Inn, uEdmore Chirambadare usebike ukuba kuzatsheka ibhetshu kwamanye amathimu ngoba amaGamecocks awasuki phezulu kwelogu yeligi yePSL.
UMthunywa uxhumane loChirambadare kuliviki ngesikhathi ekukhefu, njengoba imidlalo yePSL imiswe okwamaviki amathathu.
Umdlali lo ubike ukuthi uzatshibilika ngendlela engakaze ibonakale kumbali yenguqu yePSL.
“Nxa senelise ukuthi sikhokhele amathimu wonke okwesikhathi eside kusinika idlabuzane lokuqhubeka sisenza kuhle. Lapha akutsho ukuthi siyazikhukhumeza kodwa sibika ukuba iChicken Inn izakuyakhatshana kulisizini langomnyaka ozayo. Kungakho akusoze kubenzima,” kuveza uChirambadare.
Kulamahemuhemu athi umgadli lo usefunwa ngamanye amathimu, kodwa yena uqina ngokuthi kasuki kuChicken Inn.
Ngokudlala kuhle akwenzileyo kumnyaka wakhe wakuqala kusizini ephakemeyo, uChirambadare ulakho ukuthola imivuzo eminengi ekupheleni komnyaka, aphinde angene kukhalenda yengcitshi zabadlali.
Uthe loba ekhangelele ukwenza kuhle isizini ize iyovalwa, akusoke kumenze akhule ikhanda azitshele ukuthi useyingcitshi yenguqu.
Umgadli kuzwa lo uthe kuzamele aqhubeke eligiqa hatshi ukuzigqaja ngokuthi uyalazi ibhola.
“Abadlali basuka bazitshele ngemva kokuthola imivuzo efanayo kodwa mina ngizaqhubeka ngisebenza nzima njalo ngilandela izeluleko zabaqeqetshi,” kubika uChirambadare.
UChirambadare usehlohle amabhola ayisitshiyagalombili.
“Amabhola azabuya emanengi njalo ngizahlohlela ukuthi ngiphakamise iChicken Inn hatshi elami ibizo,” kutsho uChirambadare.
Online Reporter