admin
YiNtatheli kaMthunywa
UFELIX Chindungwe ukaputeni weHighlanders ulakho ukwehlukana lethimu le ekupheleni kwalinyanga ngoba abaqeqetshi abasuthiseki ngomdlalo wakhe.
Kubikwa uChindungwe uzaxotshwa kuqembu loWelcome “Waruwa” Ndiweni kanye labanye abafana abasanda kulichinsa kwezikaMagebhula.
Abadlali laba babalelwa kulabo abazasuswa eqenjini nxa sekulungiselelwa isigaba sesibili seligi yeCastle Lager yalonyaka.
Isisusa sokusuka kwalumdlali yikuthi uChindungwe ucatshangelwa ukuthi waqala ukusukumisa isteleka (strike) sabadlali ekuqaleni kwalinyanga.
Abadlali beHighlanders babekhalela imali zabo zebhonasi yokunqoba imidlalo kanye leye-signing on.
UMthunywa ukuveza ngokungesabi ukuthi inkokheli zeBosso zikholwa ukuthi uChindungwe wabayisigilamkhuba ngokuqala i-strike.
Phezulu kwalokhu, uChindungwe uselomnyama wokubonakala njengokaputeni ongenzi lutho. Kumidlalo embalwa edluleyo ubesehluleka ukuvimba, lalapho abethola khona ibhola ubekhanya elovalo.
Isimanga ngalokhu yikuthi imbali kaChindungwe kunguqu ikhomba ukuthi ngumdlali ozibuthileyo, okungeke kucatshangelwe ukuthi angavusa umsindo kuloba yiphi ithimu.
Imbiko evela kubafakazi abaqotho, abasebenzela iHighlanders ithi inkokheli zicele umqeqetshi ukuthi uBongani Mafu aqine ngabafana abancane kuhlandla lesibili.
UMafu wayekukhulumile mhla eqhatshwa ukuthi uzasebenza labafana abancane abazi ukuligiqa okuzwayo.
Akwaziwa ukuthi kwaphetha ngani njengoba bebanengi abadlali asebadla ubhedu.
Emdlalweni weBosso leqembu leFC Platinum uChindungwe wadlala imizuzu embalwa nje kuhlandla lakuqala andubana akhitshwe ngenxa yokungadlali kuhle.
Ebuzwa ngamahemuhemu la, uChindungwe uveze ukuthi kazi lutho njalo ulesiqiniseko sokuthi nguye olokhe engukaputeni.
“Ngokwazi kwami ngilokhe ngingukaputeni. Sengizwe abanengi bekhuluma ngokuthi ngizaxotshwa. Angazi lutho njalo ngibona angathi ngamanga,” kutsho uChindungwe.
UMafu yena uhle wathi angeke aqhubeke ngokukhuluma ngabadlali kodwa uzagxila kumalungiselelo akhe ansukuzonke.
“Sidinga isikhathi nje lesineke ukuze silolonge abadlali abancane ukuze labo bacine sebedlala kuqembu elikhulu ngoba ikusasa yeqembu lethu iphethwe yibo,” kutsho uMafu.
Online Reporter