Vusumuzi Dube
Nkosilathi Sibanda
UHLELO lweCricket Ekhaya seluncome ithalenta elitholakale eNkayi, eMatabeleland North, ngemva kohambo lwabo kumkhosi we-Miklomelo kaDakamela.
Imiklomelo kaDakamela iqhutshwe kumaviki amabili adluleyo.
Uhlelo lolu olukhokhelwa ngusaziwayo kukhilikithi, uDumisani Mankunzini, beluhlose ukwethula umdlalo wekhilikithi ebantwaneni, inengi labo elaliqala ukubona lumdlalo. Abantwana bathole ithuba lokufundiswa ukutshaya ibhola, ukuphosa lokuvimba.
UMankunzini uthe bamangaliswe lizinga lethalenta abalithole eNkayi, echaza indawo le ukuthi ilamathuba okuthuthukisa ikhilikithi.
“Ngiyamangala sibili ngobunengi bethalenta esilibone eNkayi. Abantwana bayaphangisa ukufunda njalo balomdladla. Nxa bengathola usekelo lamathuba, bangaba ngabadlali abakhulu kwelakusasa,” kutsho uMankunzini.
Uqhubeke wathi inhloso yabo kayisikho ukufundisa kuphela ngoba bafuna njalo lokuguqula impilo yabantwana abasemaphandleni.
“Inhloso yethu ngeyokuthi wonke umntwana athole ithuba lokudlala ikhilikithi aphinde athuthuke. “Akusimayelana lomdlalo kuphela kodwa kumayelana lokufundisa ukuziphatha kuhle, ukusebenza ndawonye lokubavulela amathuba.
Uphinde waveza ukuthi ukusilela kwamathuba okubukelwa phandle yikho okuvimba ithalenta lasemaphandleni, njalo uhlelo lweCricket Ekhaya lusebenza ukuvala leso sikhala ngokuhambisa umdlalo ebantwini.
Uthe umkhosi wemiklomelo kaDakamela unikeze ithuba elihle lokuthi bafinyelele abantwana abanengi.
“Siyajabula ukuthi sibanike ithuba lokufunda, njalo sizaqhubeka sibavakatshela.
“Ngilethemba ukuthi ngethalenta esilibonileyo, kungaba yisiqalo esitsha sokuthuthukiswa kwekhilikithi eMatabeleland North,” kutsho uMankunzini.
Online Reporter