Online Reporter
Nkosilathi Sibanda
IZAKHAMIZI zakoBulawayo kuliviki zizaphatheka kumkhankaso wogatsha lwe-Environmental Management Agency (EMA) lapho okuzaphawulwa khona ulwazi ngokulondolozwa kwemvelo, imithetho lokuhlanzeka.
Umkhankaso lo uqale ngoMvulo uyagqitshwa ngoLwesihlanu.
Kubikwa kuzaphathwa indaba ezisegudwini ezigoqela ukukhuthaza izakhamizi lamabhizimusi ukuthi zilandele imithetho elawula ukulondolozwa kwemvelo, ukubhadalwa kwemithelo, ukwenqabela imlilo yendle, lokuphiwa izixwayiso zokulahla izibi lenye ingcekeza ngendlela efaneleyo.
Kumbiko wayo othunyelwe umphakathi wedolobho lakoBulawayo ngoMvulo, ugatsha lwe-EMA luthe umkhankaso lo uhlose ukuthi abantu bazwisise ngezemvelo lokwakha ubudlelwano obuzakwenza kube lula ukuxazulula inkinga eziphathelane lokulondolozwa kwemvelo.
“Umkhankaso uzagoqela ukuqhutshwa kwemicimbi yokwabelana ulwazi emigwaqweni, ukuxoxisana kuma-Road block lokwabelana ulwazi emphakathini. Kuzakuba lohlelo lokuhlanza indawo, lokuhlolwa kwamachence.
“Lokhu kwenzelwe ukuqinisa ukuzwisisa mayelana lenhlelo zokulondolozwa kwemvelo lokuxazulula inkinga.
“Sinxusa izakhamizi zonke, amabhizimusi, ingatsha ezehlukeneyo labakhokheli bamabhizimusi ukuthi basekele njalo baphatheke kulumkhankaso,” kutsho umbiko we-EMA.
