Online Reporter
Ethel Ncube
ABALIMI abafisa ukuzitholela inzuzo ephezulu kulesisigaba sebexwayiswe ukuthi balime i-green pepper ngoba ilomkambo omkhulu nanko ithandwa ngabantu abanengi.
UMnumzana Mduduzi Dube ongu-agronomist kunkampani elungisa inhlanyelo eye-Agriseeds ukhuthaze abalimi ukuthi balime i-green pepper ngoba ilenzuzo emangalisayo.
Uthe i-green pepper kayihluphi ukulima.
“I-green pepper kayihluphi ukulima futhi ilinywa ngenyanga kaZibandlela kusiyacina kuNhlolanja,” kutsho uMnu Dube.
Uthe okudingakalayo nje ukuthi umlimi alime i-green pepper yikuba aqale alungise umhlabathi engakahlanyeli.
UMnu Dube uthe i-green pepper kayenzi kuhle kumhlabathi oyisidaka.
“Sikhuthaza abalimi ukuthi balime i-green pepper emhlabathini ovuma ukungena amanzi phansi lula futhi olobumunyu obuphakathi kwe 6,0 kusiya ku-6,8,” kutsho uMnu Dube.
Uthe ekuhlanyeleni isilimo lesi kumele babone ukuthi bayatshiya izikhala ukuze ingaminyani.
“Sikhuthaza abalimi ukuthi behlukanise izihlahla zabo zezilimo lezi nge-150cm ukuze i-green pepper yabo ikhule kuhle njalo ingaminyani,” kutsho uMnu Dube.
Kubikwa isilimo lesi sandise ukuhlaselwa yizibungwana kodwa zingafafazwa ziyabaleka.
“I-green pepper ivame ukuhlaselwa yizibungu ezigoqela ama aphids kanye lama-thrips njalo sikhuthaza abalimi ukuthi bayifafaze ngemithi ukuze bebulale izibungwana lezi,” kutsho uMnu Dube.
