admin
Abaculi bakuleli bayawuthakazelela umculo njalo baqhubekela phambili bewukhulisa ngendlela ezitshiyeneyo. Kuliviki uMthunywa uliphathele iqembu leMpumelelo Shining Stars elidabuka khonapha koNtuthu eMpopoma. Zizweleni okunengi ngaleliqembu kungxoxo ebekhona phakathi kukaEthel Ncube (EN) lomkhokheli waleliqembu uThembelani Owen Ndlovu (TON).
EN: Okokuqala silitshayela ihlombe ukuba liyaphatheka kumbube licula ingoma zevangeli. Umphakathi uthanda ukwazi okunengi ngeqembu lenu.
TON: Iqembu lethu kuthiwa yiMpumelelo Shining Stars Isicathamiya. Iqembu leli lasungulwa kuNkwenkwezi ngomnyaka ka2001 eNqameni, esigabeni seMophane eGwanda. Silamalunga angu-9 angamajaha wodwa. Sitholakala eNyathi Youth Centre eMpopoma koBulawayo yikho esikhona lakhathesi.
EN: Kuyini okwalikhokhelela ukuthi libumbe iqembu lenu?
TON:Sathakazelela uJoseph Tshabalala oweLady Smith iBlack Mambazo sahawukela indlela ababehlabela ngayo besenza imbube lathi sabumba elethu iqembu.
EN: Lijayele ukuhlabelela ngaphi imbube yenu?
TON: Thina asikhethi indawo lapho esidlala khona imbube yethu simelela kuphela ukuthi sinxuswe ngabantu siyekwenza esilakho.
EN: Injongo yeqembu lenu kuyini emphakathini?
TON: Injongo yethu yikuhambisa umbiko wokuthula, ukuxolelana, uthando, lensindiso. Sithanda ukuthi abantu bahlalisane kuhle ngakho ngomculo wethu siyabe sitshumayela ukuhlalisana lokubambana kwabantu.
EN:Yiziphi indawo eselake lahlabela kuzo lisenza lembube?
TON: Ngomnyaka ka2006 sanxuswa eIbumba Festivals eyayisenzelwa eStanley Square, eMakokoba koBulawayo. Ngo2008 sake sanxuswa futhi eHarare International Festival eHarare Gardens. Sesike njalo sayahlabela umculo weMbube wethu emazweni abalisa iSouth Africa, Namibia, Malawi, Botswana, Zambia, Mozambique, DRC, leSwaziland.
EN: Selake lacindezela na umculo wenu?
TON: Ye silamadlalade ayisikhombisa siphinde sibe leDVD yethu eyodwa.
EN:Likhangelele ukwenzani kuwonalo umnyaka ka2015.
TON:Sikhangele ukuya kweleMzansi Afrika mhlaka 18 Ntulikazi lapha esiyabe sicula khona eHillbrow Theatre. Sizasuka njalo siye ePretoria lapho esinxuswe ukumela iZimbabwe ku Ihlombe Festival lapho okuzabe kulamazwe abalisa iUnited States of America.
EN: Kukhona lapho eselake lathola khona isicoco?
TON: Sathola isicoco kumaNama awards saba yiAcapella yomnyaka.
EN: Yiziphi ihlupho elibhekane lazo?
TON: Inhlupho zinengi njalo kazipheli kodwa uhlupho olumqoka yikuswela ukunxuswa emicimbini yelizwe etshiyeneyo. Abantu bayalazi iqembu lethu kodwa basivalela phandle angazi ukuthi yindaba bengasinxusi sibaphakulele uluju esilalo banambithe.
EN: Mazwi bani enkuthazo elingatshiyela abafisa ukwenza imbube?
TON: Okokuqala yikuthi abantu besabe uNkulunkulu njalo bambeke phambili ezintweni zonke abazenzayo, kuzabalungela. Okunye yikubekezela, abantu kumele babekezele ngoba akulula ukwenza imbube njalo kumele behlale belolonga belungisisa amaphutha lapha lalaphana.
Online Reporter