admin
YiNtatheli kaMthunywa
OWASUNGULA iqembu leMema eliphuma elokitshini leNjube koBulawayo wethekelele kweleNgilandi lapho azafundisa khona abantu baphetsheya ukutshaya ingungu, ukuhlabela ingoma zendulo kanye legumboot dance.
UBruce Ncube ukhangelele ukuthi ayehlala phetsheya okwenyanga eziyisithupha efundisa abantu ngokwenziwa liqembu lakhe. Uzabe esenza lokhu eJaws Festival, eShetland ebatshengisa ukuthi ingungu itshaywa njani eAfrika.
UNcube ukhangelelwe njalo ukusebenza lomphakathi, labaculi bezikolo kanye labaculi bakwamanye amazwe ababalisa uSura weSenegal, uAdria labanye abavela eIsrael. Umdlali lo uveze ukuthi uthabe umanzi te ngokuba seNgilandi njalo ukhangelele ukuthi abafundise ngomculo wendulo wakuleli.
“Ngithabile ukuvakatshela lapha eShetland lapho engizabe ngifundisa abantu ukutshaya ingungu, umgido we-gumboot dance kanye lokubaculela ingoma zakudala,” kutsho uNcube.
Lumkhokheli weMema uzakwethekelela iDrum Camp eNgilandi lapho azabe efundisa khona izingoma zesintwini ezeZimbabwe engakadluleli eScotland. Uveze ukuba uzasebenzelana labaculi abesezikolo, lomphakathi wakulelo ukuze bazi ukuthi ingungu zeAfrica zitshaywa njani kanye lokuthi nxa ingungu ikhala kuhlatshelwa njani.
Uqhubekele phambili echasisa ukuthi nxa ingungu ikhala abantu behlabela otshaya ingungu akumelanga ame njalo umdumo wayo kumele ihambelane lengoma.
Uqhubekele phambili wathi lonyaka bakhangelele ukusebenzelana leqembu leZambia okuthiwa yiBUS ukuze baphakamise abatsha abaculayo abatshaya ingungu labagida i-gumboot dance.
Uphethe ngokuthi ulethemba lokuthi uzathi esephenduka ekhaya laye efunde okunengi okwenziwa phetsheya okuphathelane lokutshaya ingungu, ukucula kanye lokugida.
Online Reporter