Online Reporter
Nobuhle Mgwaqo
INHLANGANISO yeNational Aids Council (NAC) isinanzelele udubo olubhekane labazali kunye labantwana abalwisa imvukuzane yanika usekelo lwemali engangeUS$109 000 kunhlanganiso ye-KidzCan, encedisa abantwana abalomkhuhlane wemvukuzane.
Usekelo lolu, oluvela esikhwameni semali ye-Aids levy, lunikwe inhlanganiso yeKidzCan ngoMvulo, emahofisini eNAC, ngesikhathi kusethulwa amalungiselelo okugujwa kosuku lweWorld Aids Day lapho uMphathintambo obona ngezempilakahle lokondliwa kuhle kwabantwana, uDokotela Douglas Mombeshora abengumhlonitshwa.
Umkhosi omkhulu we-Wolrd Aids Day uzakwenzelwa esigabeni seMzingwane, esabelweni seMatabeleland South, mhlaka 1 Mpalakazi.
Umkhosi walonyaka ufika ngesikhathi lapho ilizwe liqinisa imizamo yokuhlanganisa izinhlelo zegcikwane lengculazi lezinye inhlelo eziqakathekileyo zempilakahle yomphakathi, ezigoqela ukunakekelwa kwabantwana abalwisa imvukuzane. Imuli ezinengi ezilwisa imvukuzane yabantwana zibhekane lomthwalo onzima wemali eziphezulu zokuhlolwa, ukwelatshwa, kunye lezokuhambisa okucina kubangela ukuthi umkhuhlane lo uphuze ukubonakala, utholakale ususabalele emzimbeni okuyikho okubangela ukulahleka kwempilo ebingasinda.
Ekhuluma emele uMphathintambo wezempilakahle, uDkt Douglas Mombeshora, ummeli we-UNAids uJerry Manyika, uthe ilizwe liqhubeka lisenza umsebenzi omkhulu wokuqinisa uhlangothi lwezempilakahle ngenhloso yokuba kungabi lomuntu osala emuva kumizamo yokulwisa igcikwane leHIV le-Aids. UMphathintambo uncome isenzo lesi njengendlela yokuphatha imali kuhle nanko befake imali kuhlangothi oluyidingayo ngesikhathi imali yosizo evela kwamanye amazwe isiyehlile.
“Usekelo lwemali engange-USD $109,000 oluvela kuNational Aids Council lusiya ku-KidzCan luveza inkalipho kanye lokunakekela impilakahle yabantu, ngenhlelo ezehlukeneyo zezempilakahle, kepha ngenhloso yokuthinta impilo zabantwabethu,” kutsho uDkt Mombeshora.
Ugcizelele ngobudlelwano obukhona phakathi kwengculazi lomkhuhlane wemvukuzane, wathi abantu abaphila lengculazi (PLHIV) basengozini enkulu yokuthola imvukuzane ezithile ngenxa yokuthi amasotsha omzimba wabo kawalamandla.
“Ukunikezwa kosizo lolu linyathelo eliqakathekileyo ekulwiseni ubunzima lobu. Imali le izasetshenziswa ukuthenga imithi eqakathekileyo, ukuhlola lokwelatshwa okuqondileyo kanye lokuncedisa ukulimukisa umphakathi ngemvukuzane yabantwana, okuqakatheke kakhulu njengoba ilizwe lethu livuselela uhlangothi lwezempilakahle,” kutsho uDkt Mombeshora.
Uphethe ngokunika inselela yokuthi basebenzise imali le ngokuhlakanipha langokuthembeka ngoba nxa ingaphathwa kuhle kuzathintwa impilo zabantwana abanengi okuzabuyisela ukubobotheka ebusweni babo.
