Online Reporter
Langalakhe Mabhena
INKAMPANI yeNetflix isiveze ukuzimisela kwayo ukuthi kube lemidlalo eminengi yase-Afrika nanko yethule umdlalo omutsha othi The Polygamist okhangelelwe ukuqala ukudlala mhlaka 12 Nhlangula.
Umdlalo lo, oleziqephu ezingu-22, uphekwe ugxile kugwalo olwathengwa kakhulu olwalotshwa ngumlobi oyisizalwane seZimbabwe, uSue Nyathi.
Umdlalo uqukethe abesifazane abane impilo zabo ezihlangene loJonasi Gomora osebenza kwezezimali futhi ocebileyo. Ugwalo lolu, luhlola uthando, amandla lokungathembeki, lubuye lukhangelisise ngamaqiniso omtshado wesithembu.
Umdlalo lo, ulenjongo ezibalisa ukulangazelela, ukusinda kanye lokuhlukuluzeka emoyeni, okutshengisa ukukhula kwendingeko yezindaba zase-Afrika ezijulileyo, ezihambelana lezehlakalo zakithi.
Umdlali owathola isicoco uSdumo Mtshali ulingisa engu-Jonasi Gomora, indoda elamandla kakhulu phezulu kwezamabhizimusi. UGugu Gumede ulingisa engumkakhe, uJoyce Gomora, etshengisa owesifazana obhekane lothando lokwethembeka emtshadweni olukhuni.
Uchungechunge luphinde luveze iqembu labalingisi abalingisa kumdlalo ofanayo ababalisa uKwanele Mthethwa, uSthandiwe Kgoroge, uKenneth Nkosi lomahlekisa uCeleste Ntuli. ULuyanda Zwane loVuyo Biyela bengezelela kulokho, bebumba uluhlu olwehlukahlukeneyo.
Umdlalo uphekwe yi-Stained Glass Productions, eyaziwa ngemidlalo edumileyo yaseSouth Afrika efana le-Uzalo, i-Durban Gen le-The Wife. Ukuthinteka kwabo kutshengisa ukuphekwa komdlalo wohlonzi lwaphezulu.
Umdlalo uThe Polygamist utshengisa umkhuba okhulayo kumabonakude wase-Afrika, lapho amabhuku esesetshenziswa ukuze kuthintwe abantu abanengi. Imisebenzi le isiza ukuletha izindaba ezilamandla empilweni yokuxhumana lababukeli kulo lonke izwekazi laphetsheya.
Ngeqembu layo labalingisi abaqinileyo lendaba ehlaba umxhwele, kukhangelelwe ukuthi umdlalo uhuge abanengi ngesikhathi usethulwa.
