adminYiNtatheli kaMthunywa
UMDLALO wethenisi edolobheni lakoBulawayo ukhangelelwe ukuthi ubelemncintiswano eminengi lonyaka, kuhloswe ukulolonga abadlali abamela isizwe phetsheya.
Inkokheli ezintsha zomdlalo koNtuthu zithe loba kulabaqeqetshi abalutshwane, sekulemzamo yokudonsa abadlali abasezikolo lababalisi ukuze ithenisi ibe lodumo.
Abaphathi bomdlalo labanye abaqeqetshi bathe kusukela kulimpelaviki bazathatha inyathelo lokudinga abaqeqetshi abatsha.
Abaqeqetshi balumdlalo kubikwa kulesidingo sokuthi bayengezelelwe.
Unobhala weBulawayo Metropolitan Tennis Board uThesly Mufunda ubikele uMthunywa ukuthi sebelungiselele ukungenisa ekilasini abaqeqetshi abatsha, ikakhulu abasemalokitshini lapho okuzafundiswa khona ngenguquko esikhona kuthenisi.
UMufunda uphinda abengumqeqetshi weGirls College koBulawayo.
Abaqeqetshi abadingwayo kubikwa bazancedisa ukulolonga abadlali abancinyane lokucebisa nxa sekukhethwa amathimu amakhulu.
“Inhloso yethu kuloluhlelo yikuthi sengeze abaqeqetshi labadlali abaphuma emalokitshini. Sizama ukwengezelela ulwazi lwabaqeqetshi ukuze bengasaleli emuva ngoba ithenisi isiguquka.”
Uqhubeke wathi: “Asazi ukuthi sekwathini kuthenisi yakoBulawayo? Sibonile ukuthi akusizi ukuthi sifundise emasebhabha lapho okuvele kulenkundla lempahla zomdlalo.”
Uthe emalokitshini kugcwele ithalenta elinengi okokuthi kungadingwa abaqeqetshi abanengi, ithenisi yakoBulawayo ingaphenduka kusimo sayo sakudala.
UMufunda ukhuthaze intsha yakoBulawayo ukuthi isebenzise ikhefu lezikolo ukuthola ulwazi ngalumdlalo.
“Ngesikhathi sekhefu langempelasonto zonke, abantwana lalabo abafisa ukuqeqetsha ababuye ngobunengi babo ukuzofundele ithenisi.
Online Reporter