I-Orlando Pirates igeca abadlali

I-ORLANDO Pirates idlale ngezithukuthuku zabalandeli bayo abebevotela umgadli uLehlohonolo Majoro kuCarling Black Label Champion Cup ifaka lumgadli weBafana Bafana loSifiso Myeni ehlelweni lwabadlali abahlanu ebachithayo.

Izolo iPirates iphosele ku-website yayo amabizo kaMajoro, uMyeni, uRoger Majafa, uFelipe Ovono, uLetsie Koapeng loYasser Mugerwa njengabadlali engasabadingi.

“IPirates isingaluqinisekisa uhlu lwabadlali abafakwe eluhlwini lwayo lwabachithwayo. Ngaphambi kokwenza lesi simemezelo i-Orlando Pirates iyabika ukuthi laba abadlali bangabasebenzi bayo. Ngemuva komhlangano labaphathi siyakuqinisekisa ukuthi laba abadlali bayahamba.

“UMyeni, Majafa, Koapeng, Majoro, Ovono loMugerwa bonke baseluhlwini lwabahambayo. Usihlalo weqembu u-Irvin Khoza uzohlangana labanye abadlali ekkhulumisane labo ngekusasa labo,” kutsho i-website yePirates.

Okumangalisa kakhulu yikukhitshwa kukaMajoro yena obebalelwa kubadlali abamqoka phambili kwenkundla.

Kusegcekeni ukuthi umdlali lo engathathwa laloba yiphi ithimu.

Kumangaze lokukaMyeni ngoba ubelithola njalo ijezi ngesizini eyedluleyo.

Bese kulesikhathi iPirates ingaphumeli obala ngoMajoro obekuvela ukuthi uphelelwa yi-contract yakhe leqembu, okwenze amaqembu anjengeBloemfontein Celtic amcathamele.

Lokhu kudale ukuthi angasali laseluhlwini lwabadlali abebevotelwa kakhulu kuCarling iPirates ezodlala leKaizer Chiefs eFNB Stadium, mhlaka 30 kuNtulikazi.

UMajoro ubebalwa labadlali abahamba phambili ngamavoti kuPirates, ngokukhethwa ngabalandeli abangaphezulu kwe-55 000.

UMajoro uzakhele udumo ngokuhlohlela i-AmaZulu amabhola angu-14 ngesizini ka-2010/2011 obekungeyakhe yokuqala ku-Absa Premiership. Ngemuva kwalokho uMajoro, obesebizwa kuBafana Bafana ayidlalele ku-Africa Cup of Nations ngo-2013, uwelele kuChiefs yona ayitshiye ngo-2014 esiya kuPirates.

UMyeni yena esayina kuPirates ngo-2012 wachayisa iMamelodi Sundowns eyayimfunisa kabi esangukaputeni weBidvest Wits. — Ubulembu

Related Posts

Kutsha izakhiwo ezintathu enzikini yedolobho lakoBulawayo

Raymond Jaravaza IZAKHIWO ezintathu ezisenzikini yendawo yamabhizimusi koBulawayo zilumathe umlilo ngoLwesibili emini. Okwakhathesi, izicitshamlilo zeBulawayo Fire Brigade ziphakathi komsebenzi kulindawo esemgwaqweni kaLobengula Street ku-3rd lo 4th Avenue. Izimota eziyisithupha zokucitsha…

IBosso ibonga abasekeli

Nkosilathi Sibanda IQEMBU leHighlanders selibonge bonke abasekeli balo abahambe eGweru ukuyakhuza iqembu kumdlalo walo leTelOne ngoMgqibelo. Kumbiko okhitshwe liqembu ngoMvulo ekuseni, iBosso ithe uthando lwabasekeli kaluqhubeke, njalo lukhuthaza abadlali, abaqeqetshi…

Leave a Reply

Your email address will not be published. Required fields are marked *

×
×