admin
Cornelius Luphahla
ZISELE zibambe imilomo yangaphansi izakhamizi zesigabeni seSiphezini eMzingwane ngemva kokuba esinye isakhamuzi sakule indawo sikhutshelwe inyoka okubikwa yatshiywa nguyise owayeyisebenzisa ukuzinothisa.
Lesisiga senzakale ngoMgqibelo kuviki ephelileyo lapho uNkosazana Maida Moyo okhitshelwe khona inhlathu ekhukhumale yesabeka okubikwa yatshiywa nguyisezala ngemva kokubhubha kwakhe.
Kuzwakale ukuthi inyoka le ikhitshwe ngabaphurofethi abakule indawo nanko phela ngemva kokubhubha kwabanikazi bayo yahle yaqala ukulala labantwana bakulo umuzi njengoba nje kulamantombazana amanengi kakhulu lapha.
UMthunywa ukhulumisane loMnumzana Lyton Siziba oyisakhamuzi kule indawo waveza ukuthi wayekhona mhla kukhutshwa inyoka le njalo abaphurofethi bathi ibisigangile kakhulu.
“Mina ngangikhona mhla abaphurofethi bekhipha inyoka le koMaMoyo njalo yayifuna ukubaluma ihwabha kakhulu.
Bathi ngemva kokuyibamba bathi yatshiywa nguyisezala kaMaMoyo owayeyisebenzisa ukuzinothisa ngayo ngakho ibisibulala izifuyo ibuye ilale labesifazana.
“Abaphurofethi laba babuya njalo bathi inyoka le ibisifuna ukubulala uNkszn Moyo njengoba ubengayiphi ukudla njengoyisezala loninazala ababeyipha,” kutsho uMnu Siziba.
UNkosazana Sipho Nkomo ongumzukulu kaNkszn Moyo uveze ukuthi ngemva kokukhitshwa kwenyoka le kwavuka kufe izikhova ezimbili okubikwa zalala zisilwa kabuhlungu.
“Kwathi mhla abaphurofethi bekhiphe inyoka le esiphaleni sathi sesilele ebusuku sezwa kusilwa izikhova ekhaya kungathi kulwa inyoni ezinkulu okwesabekayo. Izikhova lezi zalwa kwaze kwaba semadabukakusa kodwa isimanga yikuthi sathi sivuka ekuseni sathola izikhova ezimbili zifile eduzane lomkulu.
“Sazithatha sazisa kubaphurofethi bazitshisa bathi izikhova lezi ngezomunye umakhelwane ngakho bezivulelwa yinyoka le ukuthi zingene ekhaya zihamba labanikazi bezothakatha ngakho zehlulekile ukuphuma zaze zalwa zabulalana,” kutsho uNkszn Nkomo.
Omunye walaba baphurofethi laba abakhiphe inyoka le oziveze ngokuthi nguSiziba ebuzwa ngale indaba uvumile ukuthi yenzakala wathi ngeke alandise okunengi.
“Kuliqiniso sibili ukuthi sakhipha inyoka kwesinye isakhamuzi kwavuka kufe izikhova ezimbili kodwa ngeke ngilandise okunengi kungcono libuze abanikazi bomuzi okwenzakala khona indaba le,” kutshon uMnu Siziba.
Ebuzwa ngale indaba uNkszn Moyo uveze ukuthi inyoka yaphuma emzini wakhe kodwa babengazi ukuthi kulenyoka.
“Kuliqiniso sibili ukuthi kwaphuma inyoka emzini wami kodwa thina sasingazi ukuthi kulenyoka enjalo lapha ekhaya noma nje kwakukhona okwakusisolisa,” kuphetha uNkszn Moyo.
Online Reporter