Online Reporter
Brandon Moyo
ILIGI yeBulawayo Metropolitan Rugby Football Board (BMRFB) Archer Clothing isingene kukhefu lengxenye yesizini, okwamaviki amabili.
Besekudlalwe amahlandla amahlanu.
Ikhefu leli, eliqale ngempelaviki edluleyo, livumela ukuthi amaqembu athole ukuziqinisa.
“Ngemva kwamaviki amahlanu emidlalo, iligi yeBMRFB Archer Clothing ingene kukhefu lamaviki amabili. Amaqembu kumele aphumule ngoba ethule imidlalo ebukekayo maviki wonke. Ikhefu lizaphinda lithole ithuba lokuthi amathimu aziqinise, alungisise okuxegayo, andubana aphenduke enkundleni.
“Ngifuna ukuncoma wonke amaqembu ngokuzimisela kwawo. Atshengisele idlabuzane lothando lomdlalo. Ngikholelwa ukuthi nxa siphenduka emidlalweni sizabona umncintiswano ozahlabusa,” kutsho umqondisi wemidlalo uGeorge Hlatshwayo.
Loba kulekhefu, amanye amathimu azaqhubeka edlala ngoba esalele emuva kuligi.
NgoMgqibelo, iWestern Suburbs Panthers inqobe iMahogany nge 24-22. Ngokuma kwengalane yamaqembu, iphethe imiklomelo engu-20.
Intshantshu zanyakenye lezi kazikanqotshwa kulisizini njalo zingene kukhefu zinqobe isitha esikhulu iMatabeleland Warriors nge 39-25.
IMatabeleland Warriors ikunombolo yesibili ngemiklomelo engu-17. IWestern Panthers iyalandela ngemiklomelo engu-14, kunombolo yesine kuleHighlanders elemiklomelo eyisitshiya galombili. Kweyesihlanu kuhlezi iBulls ilemiklomelo eyisithupha.
Emsileni welogu kuleBulldogs iphethe umklomelo owodwa. Leliqembu kalikanqobi emdlalweni.
Kuhlandla labesifazane kubusa iWarriors ngemiklomelo engu-15, kulandelwa iLions (12), Bulldogs (10). IPanthers ikunombolo yesithathu ilemiklomelo emihlanu. Kucina ngeHighlanders elemine.
