admin
Cornelius Luphahla
INHLANGANISO ekhangela ngezokulima iAgritex ikhuthaza abalimi ukuba bavikele izilimo zabo ikakhulu umumbu ekuhlaselweni yi-stalk borer njengoba sivame ukwanda nxa kungela zulu elinengi.
Lokhu kuvezwe nguAgricultural Extension Specialist uMnumzana Alpha Ndlovu.
UMnu Ndlovu uthe isibungwana lesi, i-stalk borer siyehlisa isivuno somlimi nxa izilimo zingasavikelwanga njalo sihlasela kakhulu umumbu osuleziqu.
“I-stalk borer sihlasela kakhulu umumbu osuleziqu ngokudla iziqu lezi kanye lentanga zomumbu. Ekudleni lapha sitshiya isiqu sibolile njalo singelantanga okuyikho okwehlisa isivuno kubalimi,” kutsho uMnu Ndlovu.
UMnu Ndlovu uqhubekele phambili waveza ukuthi i-stock borer lesi sivikeleka ngcono ngendlela zesintu noma nje kulemithi yokusivikela yesikhiwa.
“I-stalk borer lesi sivikelwa ngokukhitshwa ngezandla sinikwe inkukhu ukuze zingaqhubeki zizalana. Okunye njalo umlimi kufanele agamule amahlanga ngemva kokuvuna awalalise phansi ensimini okwenyanga ezimbalwa ukuze izibungu lezi zihluzulwe yinhlabathi zife njengoba zibuthakathaka.
“Kwesinye isikhathi umlimi engavikela izibungu lezi ngokuquphuna izilimo esezihlaselwe azitshise kumbe angavuna atshise amahlanga wonke.
“Noma nje kulendlela zesintu zokuvikela izibungu lezi kukhona njalo imithi yesikhiwa esetshenziswa ukuvikela izibungu lezi. Omunye wemithi le yi-besseola fusca othelwa emanzini umlimi afafaze insimu ehlaselwe yizibungu lezi. Kuqakathekile njalo ukuthi afafaze lezilimo ezingahlaselwanga ukuze zingaze zahlaselwa njalo,” kuphetha uMnu Ndlovu.
Online Reporter