admin
Fairness Moyana
“NKOSI, mina ngiliShona njalo umdlalo engangiwudlala lomlamu wami kawumangalisi ngitsho kusiko lakithi,” la ngamazwi elinye ixhegu ebelimiswe phambi komthethwandaba weHwange Regional Court lisetheswa icala lokudlwengula umlamu walo ofunda uGiredi 7.
Ixhegu leli elileminyaka engu-57 litholakale lilecala njalo lizapika ejele iminyaka engu-13 lisebenza nzima.
Umantshi kulelicala uDambudzo Malunga uphinde njalo wamangaliswa ngamazwi kamsolwa esola umthethwandaba ngokwenza kukhanye sengathi wenze icala elikhulu kukanti yena kaphambanisanga lutho ngoba kulisiko lakhe.
Inkundla izwe ukuthi mhlaka 24 Zibandlela kuwonalo umnyaka ngehola lika11 ekuseni umsolwa walaya umlamu wakhe ukuthi aphendukise i-washing powder ayeyithethe andubana amlaye ukuthi ayeyifaka endlini yakhe yokulala.
Kuzwakale ukuthi umamangala esephuma endlini umsolwa wafika wamdonsela endlini lapho abafika balwisana khona.
Umtshutshisi kucala leli uTawanda Sigauke uveze njalo ukuthi umsolwa wavula izikopela zesigqoko sikamamangala andubana amkhuphe isikhindi afake iminwe yakhe okwabangela ukuthi alimale.
Umamangala kubikwa walwisa umsolwa waze waphunyuka waqonda esikolo lapho afika wabikela unina womngane wakhe onguye owatshayela ucingo ubabakazi kamamangala eHarare.
Indaba le yabikwa emapholiseni ahle abopha umsolwa.
Ebuzwa emthethwandaba ngecala lakhe leli umsolwa wale wemba phansi wathi icala aletheswayo kalazi ngoba kazange adonse isikhindi sikamamangala kodwa wasibamba nje saphuma ngoba singadingi amandla amanengi ukuze sikhitshwe.
Wengezelele wathi kazange amdlwengule kodwa wamfaka iminwe isikhindi sesiphumile “lanxa engazange akujabulele kodwa vele kakudingi ukuthi ajabule nxa edlala lami,” kutsho umsolwa.
Umantshi ugwebe umsolwa iminyaka engu-15 andubana ephule iminyaka emibili kukhangelelwe ukuthi angenzi icala elifanayo kuminyaka emihlanu elandelayo.
Online Reporter