Online ReporterEthel Ncube
I-NGCITSHI kwezokulima sezixwayise abalimi ukuthi kulesi isigaba sokulima belime i-sugar beans ngoba zilenzuzo emangalisayo.
UMnumzana Edward Chikwaya ongu-Agricultural Extension officer kunhlanganiso ye-Zimbabwe Development Democracy Trust ukhuthaze abalimi ukuthi balime i-sugar beans ngoba zilenzuzo futhi kazihluphi ukulima.
“I-sugar beans kazihluphi ukulima njalo zilinywa ngoZibandlela kusiyacina ngoNhlolanja. Sikhuthaza abalimi ukuthi beqale belungise umhlabathi bengakazihlanyeli,” kutsho uMnu Chikwaya.
Uqhubekele phambili wathi ukhuthaza abalimi ukuthi nxa sebehlanyela beqale ngokufaka umquba.
“Sikhuthaza abalimi ukuthi nxa behlanyela beqale ngokufaka ifethalayiza yeCompound D beyihlanganise lenhlabathi ukuze izilimo zabo zikhule masinya. Abalimi sibakhuthaza ukuthi nxa sebehlanyela begebhe amagodi angaba yi-2 kusiya ku-5cm ukutshona,” kutsho uMnu Chikwaya.
Uthe i-sugar beans kaziphuzi ukuvuthwa.
“I-sugar beans kaziphuzi ukuvutha njalo zithatha inyanga ezintathu ukuthi zivuthwe zibe seziqalisa ukuvunwa,” kutsho uMnu Chikwaya.
Uthe i-sugar beans loba kungenzeka ukuba zihlaselwe yizibungu kodwa zinlutshwane kungakho abalimi bakhuthazwa ukuba bazifafaze ngomuthi.
“I-sugar beans zivame ukuhlaselwa yizibungu ezigoqela intwala njalo sikhuthaza abalimi ukuthi bazifafaze ngemithi etholakala ezitolo ezithengisa imithi edolobheni,” kuphetha uMnu Chikwaya.
