Vusumuzi Dube
Ethel Ncube
UMKHUHLANE we-swine flu uyingozi kulabo abafuye ingulube kungakho bakhuthazwa ukuthi bazame ngazo zonke indlela ukuvikela izifuyo zabo kuwo.
Inkuthazo le ivele kuDokotela wezifuyo, eVeterinary Services uMaria Jakarasi.
UDokotela Jakarasi onguGovernment Veterinary Officer esabelweni seMatabeleland North uthe abafuye ingulube kumele bananzelele i-swine flu ngoba uyabulala ingulube ngesikhathi esifitshane.
“Umkhuhlane lo umemethekiswa ngumoya kukanti ezifuyweni ezihlala ndawonye uthelelwana ngokuthintana kwazo,” kutsho uDkt uJakarasi.
Uthe umlimi ofuye ungulube ulakho ukubona masinya nxa izifuyo zakhe sezihlatshwe ngumkhuhlane lo.
“Isifuyo esesihlatshwe ngumkhuhlane lo siyakhwehlela, singenwe ngumqando, sehluleke ukudla futhi sigeleze bamakhovula emakhaleni,” kuchasisa uDkt uJakarasi.
Uthe umkhuhlane lo uyelapheka nxa umlimi engaphangisa ukuwunanzelela.
“Umkhuhlane we-swine flu uyelapheka nxa umlimi engawuphangisela. Umlimi olezifuyo esezihlaselwe ngumkhuhlane lo simkhuthaza ukuthi engazihlanganisi lezinye ukuze zingathelelani umkhuhlane lo.
“Lezo esezigula kumele zinikwe ama-antibiotics njalo ukhululekile ukuthi afike emawofisini ethu simncedise ukuze angalahlekelwa zingulube zakhe,” kuphetha uDkt uJakarasi.
Online Reporter