Online Reporter
YiNtatheli kaMthunywa
INHLANGANISO ye-United Nations Development Programme (UNDP) isincedise izigaba zemaphandleni ebezingela magetsi ngamandla asebenzisa ilanga osekuphucule impilo zabo.
Kubikwa indawo ezinengi ebezingela magetsi sezithole usizo lwamandla avuselelekayo asebenzisa ilanga osekusenza imizi eminengi ibe lokukhanya njalo kusungulwe amabhizimusi okuziphilisa.
Kwezempilakahle ukusetshenziswa kwamandla elanga sokuncedise ukuthi emakilinika kunye lezibhedlela kulondolozwe imithi.
“Sesifake ama-solar emakilinika lezibhedlela ezedlula i-1 000 elizweni lonke leZimbabwe. Ukucitshwa kwamagetsi okungahlelekanga kuyingozi kumpilakahle yalabo abaphathekileyo emzimbeni. Kungatsho ukuphila kwabo kumbe ukufa kwabo, ngalesi isizatho sabona kuqakathekile ukuba sifake ama-solar ezibhedlela, okungamandla avuselelekayo.
“Sesisungule uhlelo lwe-cold chain system ukuze silondoloze imithi ebalulekileyo ezibhedlela,” kutsho uNkosikazi Ethel Bangwayo, onguUNDP National Enonomist.
Kulandela indlala ebekhona ngomnyaka ka-2024 eyabangelwa yi-El Nino njengoba izulu laba lilutshwana, inhlanganiso ye-UNDP yafaka imitshina yokudonsa amanzi esebenzisa ilanga (solar-powered systems) endaweni zokulima kuthelezelwa ezehlukeneyo.
UMnumzana Mr Solomon Mutambara, ongu-UNDP Programme Manager for Climate Adaptation, Water and Energy Projects uthe ukufakwa kwama-solar okudonsa amanzi endaweni ezehlukeneyo sokuguqule impilo zabantu emaphandleni.
“Sesafaka imitshina yokudonsa amanzi esebenzisa ilanga kuma-irrigation schemes amanengi okwancedisa ukwehlisa ukukhitshwa kwekhabhoni (carbon emissions) kanye lendleko eziphezulu zamagetsi.
“Lokhu sokuguqule impilo zabantu abanengi, kwabuye kwabaphathisa ukuthi babe lempilo ezingcono futhi sekwehlise lezifo zokuphefumula ezigabeni ezihlosiweyo,” nguMnu Mutambara lo.
Uqhubekele phambili wathi impilo yabatsha layo isiguquka.
“Abatsha labo siyabafundisa nge-solar technology ukuze benelise ukuncedisa izikolo ezingelamagetsi kunye lezigaba. Lokhu sokuncedise kwezemfundo, eHakwata eChipinge lapho esafaka khona ama-solar ukuphumelela kwabafundi sokukhuphikile. Esikolo lesi ukuphumelela lokhu kwaba yi-35 phesenti.
“Sokulamakhompuyutha kwezinye izikolo osokuguqule imfundo yakulezi indawo,” kutsho uMnu Mutambara.
I-UNDP iqhubekisela phambili imizamo yokukhulisa komnotho okugoqela abantu bonke, ukuvikelwa kwezemvelo, ukunciphisa umthelela wokuguquka komkhathi kanye lamandla avuselelwayo kuhloswe ukuthuthukisa umphakathi welizweni leZimbabwe.
