Online Reporter
Lovemore Dube
INHLANGANISO yeZenzo Moyo Soccer Foundation isisungule ubudlelwano leZimbabwe Prisons and Correctional Service (ZPCS) koBulawayo ngenhloso yokuthuthukisa umdlalo wenguqu emajele ngokusekela iBulawayo Inmates Football Association.
NgoMvulo, inhlanganiso le ingene kusivumelwano sokusebenzisana leZPCS Bulawayo Metropolitan eKhami Prison, okulinyathelo elikhangelelwe ukuletha intuthuko kwezemidlalo lokuvuselela ithemba kwabavalelwe emajele.
Emele iZPCS emkhosini lo, umphathi weZPCS Bulawayo Metropolitan Province, uMkhulunyelwa Ngwenya, wamukele ngenjabulo ubudlelwano lobu esithi umdlalo ulomlandu omkhulu ekuguquleni impilo zabantu.
Emkhosini lo bekulabosaziwayo abadumileyo kwezemidlalo okugoqela umqeqetshi weHighlanders, uBenjani Mwaruwari, owayelilunga leZifa Normalisation Committee, uSikhumbuzo Ndebele loBrian Moyo.
Bekhuluma ngemva kwesivumelwano, abammeli beZenzo Moyo Foundation bathe ubudlelwano lobu buhlose ukusebenzisa umdlalo wenguqu njengendlela yokulungisa isimilo, ukufundisa ukuziphatha okuhle lokuncedisa ekubuyiseleni abantu emphakathini ngemva kokuphuma ejele.
Ngokutsho kukaNgwenya, ijele ayisiyo ndawo yezijeziso kuphela kodwa inekeza umuntu ithuba lokuthi aguquke, ngakho ezemidlalo zilendima enkulu kulokhu.
“Uhlelo lwethu lwezemidlalo silusungule ngomnyaka ka-2025. Seluphathise kakhulu ekutshintsheni isimilo, umbono lempilakahle yezibotshwa. Sikubone kufanele ukuthi sibambane lenhlanganiso yeZenzo Moyo Foundation ukuze sibonise ubukhulu benguqu ekuguquleni impilo,” kutsho uNgwenya.
IBulawayo Inmates Football Association isileminyaka isebenzisa umdlalo wenguqu njengendlela yokunika abavalelweyo ithuba lokuziveza lokwakha ikusasa elingcono.
Ngaphansi kwesivumelwano esitsha, iZenzo Moyo Foundation kukhangelelwe ukuthi inikeze usizo olufana lamakithi, amabhola lolunye usekelo oluzathuthukisa ezemidlalo emajele.
