Online Reporter
Nkosilathi Sibanda
OSOMABHIZIMUSI abasakhulayo koBulawayo sebekhuthazwe ukuthi bathathe ithuba lokutshengisa imisebenzi yabo kumbukiso weBulawayo MSMEs Winter Expo ozaqhutshelwa eCity Hall Car Park kusukela mhla ka-25 kusiya ku-27 Nhlangula.
Umbukiso lo uqhutshwa lugatsha lwe-Women Affairs, Community, Small and Medium Enterprises Development lubambisane lekhansili yakoBulawayo lezinye inhlanganiso.
Umbukiso lo uzabe uqhutshwa ngaphansi kwesihloko esithi: “Ukuqinisa Amabhizimusi Asakhulayo koBulawayo Kwezokusungula Okutsha, Ukuqhatsha, Ukuqina Kwezomnotho Lentuthuko Eqhubekayo Ehambelana leVision 2030.”
Abaqoqi bombukiso bathe umcimbi lo uzanika osomabhizimusi ithuba lokubonisa imisebenzi yabo, ukwandisa imkambo, ukuthola abathengi abatsha lokwakha ubudlelwano labanye osomabhizimusi.
Umbukiso lo kukhangelelwe ukuthi uhlanganise abantu abavela endaweni lamabhizimusi ehlukeneyo agoqela ezokulima, ukuthunga impahla, ukudla, ubungcitshi bemitshina emitsha yakulezinsuku, imisebenzi yezandla lamanye amabhizimusi amancane aphakamayo.
Umbukiso lo uza ngesikhathi esifaneleyo njengoba amabhizimusi amancane eseqhubeka edlala indima enkulu ekuvuseleleni umnotho welizwe, ukudala amathuba emisebenzi lokuthuthukisa impilo yemuli ezinengi.
Kumbiko owethulwe ngabaqoqi bombuthano kuliviki, umbukiso lo uzaphinda unike osomabhizimusi ithuba lokuhlangana lenhlanganiso ezixhasa ngemali, amabhanga loHulumende ukuze bathole ulwazi olungabanceda ukukhulisa amabhizimusi abo.
Umbukiso uzavulwa kusukela ngehola lesitshiya galombili ekuseni kuze kube lihola lesihlanu ntambama nsuku zonke.
