Online Reporter
Yintatheli kaMthunywa
KULANDELA ukumemetheka kwamavidiyo lemifanekiso obunqunu locansi ebulenjini, ugatsha lweBroadcasting Authority of Zimbabwe (BAZ) seluveze ukukhathazeka okukhulu, luchaza ngokwephulwa komthetho lokutshaphaza isimilo somphakathi wakuleli.
Amavidiyo lemifanekiso le, ngokutsho kweBAZ kwephula imithetho yelizwe njalo kuphazamisa inhlalakahle lokuziphatha komphakathi.
Kumbiko wayo okhitshwe ngoLwesibili, iBAZ ithe ikhathazekile ngokugcwala kwemifanekiso le. Ithe konke okuphuma ebulenjini, okubukelwa kuleli kumele kulandele imithetho yelizwe, kungakhathalekile ukuthi kuphuma kuyiphi inkundla.
Umphakathi ukhunjuzwe ukuba izizalwane zakuleli zilelungelo lokukhululeka ukuveza imicabango, imizwa kunye lemibono yazo zingesabi ukujeziswa, njengokuphawulwa yisisekelo sombuso.
Kodwa-ke, ilungelo leli lilomkhawulo. Umthetho weZimbabwe ucacisa ukuthi inkululeko le kumele isetshenziswe ngendlela engalimazi abanye, ikakhulu abantwana, njalo ingaphambanisi isimilo lomumo wokuziphatha komphakathi.
“Ngokulandela iBroadcasting Services Act (Isahluko 12:06), abantwana balelungelo lokuvikelwa kulokhu okungabalimaza isimilo lokukhulakwengqondo zabo, kukhangelwe izifiso lezidingo zomntwana, yikho okumele kube phambili ngaso sonke isikhathi,” kulandisa iBAZ.
Ugatsha lolu luphinde lwabeka umzekeliso ngomthetho we-Censorship and Entertainment Control Act (Isahluko 10:04), owenqabela ukusabalaliswa kokuqukethwe imifanekiso engahloniphiyo, engcolileyo kumbe ecasulayo, kunye lalokho okonakalisa isimilo somphakathi. IBAZ iphinde yathi abasakazi labanikazi bokuqukethwe ku-inthanethi balesibopho esisemthethweni sokulondoloza isimilo somphakathi lezimiso zesizwe.
I-BAZ ixwayise yathi kayisoze ivumele ukusetshenziswa kubi kwenkundla ze-inthanethi ngendlela ephula isisekelo sombuso, imithetho yelizwe kumbe izimiso zesimilo esamukelekileyo emphakathini.
Labo abenza imidlalo ye- inthanethi bakhunjuzwa ngomthwalo wabo wokuziphatha lokuba lesibopho esisemthethweni sokuqinisekisa ukuthi kuyahambisana lemithetho yeZimbabwe njalo kuhlonipha amalungelo lesithunzi sazo zonke izizalwane, ikakhulu abantwana.
IBAZ ithe izathatha amanyathelo afaneleyo okuqinisa umthetho, ngaphansi kwamandla ayo asemthethweni ukuze kuqinisekiswe ukulandelwa komthetho lokuvikelwa komphakathi.
UHulumende, ngokutsho kweBAZ, uhlala ezimisele ukuvikela isimilo sesizwe lokulondoloza abantwana ekufinyeleleni kokuqukethwe yi-inthanethi okungalimaza ukukhula kwabo.
