Online Reporter
Zimpapers Sports Hub
Chicken Inn 0-1 MWOS
IQEMBU elichinsa ukudlala kuCastle Lager Premier Soccer League, iMWOS lengeze ubuhlungu kumqeqetshi weChicken Inn, uJoey Antipas ngeSonto emini.
IChicken Inn bayinqobe 1-0, enkundleni yeLuveve, okutshiye u-Antipas enwaya ikhanda, ezibuza ukuthi kungani amakhasi akhe engahlangani ngendlela afisa ngayo.
Umqeqetshi lo usenqobe kanye, kumidlalo elitshumi. Lo, bekungumdlalo wesithathu enqotshwa.
IMWOS iyakhokhela kulogu ngemiklomelo engu-22. IChicken Inn ilesitshiya galolunye.Okwakhathesi iqembu leMWOS, ilandelwa yiScottland, eletshumi lasitshiya galolunye.
Ngomzuzu wesi- 37, uNigel Matinha ulivuthele langena emambuleni ibhola, kwaba yikukhokhela kweMWOS. Ibhola elihlohloweyo litshiye unozinti weChicken Inn uDonovan Bernard ecwayiza. Kalibonanga libuya.
Esigabeni sokuqala somdlalo, iMwos ibiliqembu elingcono, isenelisa ukuthola amathuba okuhlohla. Umdlali wayo uBilly Veremu wehluleke ukuqondisa kakuhle ibhola, eseduzane legedi. Imvimbi zeChicken Inn beziqaphele, zilikhiphe “emsindweni” ngokuphangisa.
Ama-Gamecocks azamile ukwethusela. Njengoba ebesekhaya, bekumele angene enkundleni ngokuzethemba. Ngomzuzu wesibili, uTinashe Mushaireni ukhuthe kancane ukubhobozela, okungabe kubelibhola elihlohlwe yiChicken Inn.
Esigabeni sesibili somdlalo iChicken Inn ikhiphe uEdward Musena yangenisa uGeorge Majika. UTinashe Mushaireni uhlaliswe phansi, kwangena uBrighton Makopa.
IMWOS, ibizethemba. Ikhiphe uGodfrey Manase kuphela, ongenele indawo kaMathew Murambiwa.
Eqinisweni, iChicken Inn yiyo ebibambe umdlalo kusigaba sesibili, kodwa ibelomnyama wokungahlohli. Unozinti weMWOS uMartin Mapisa ubeyingcino egedini.
Amaqembu:
Chicken Inn:
Donovan Bernard (unozinti), Kudzai Dzingwe, Kumbirai Mutenha (Brendon Rendo, 64mins), Joseph Tulani, Xolani Ndlovu, Dominic Jaricha, Nelson Ketala, Michael Charamba, Mpumelelo Bhebhe, Tinashe Mushaireni (Brighton Makopa, 46mins), Edward Musena (George Majika, 46mins).
MWOS:
Martin Mapisa (unozinti), Tafadzwa Nyabunze, Valentine Katsande, Innocent Zambezi, Mathew Murambiwa (Godfrey Manase, 46mins), Tafadzwa George, Clive Kangwari, Malvern Mudzuka, Billy Veremu (Arthur Banda, 61mins), Claude Mapoka (Salif Cheya, 61mins), Nigel Matinha (Gift Saunyama, 61mins)
