Online Reporter
Vusumuzi Dube
IKHANSILI yakoBulawayo ibika ukuba izavala ibhawa yeMarisha e-Old Magwegwe, kuvulwe ikolitshi lezifundo, elizabizwa ngokuthi yi-Innovation Techno Centre. Inhloso yalokhu yikuphakamisa intsha yedolobheni lokuthuthukisa ukuvulwa kwamabhizimusi lokwamukela ukusetshenziswa kwemitshina yakulezinsuku.
Kumbiko wekhansili osanda kukhitshwa, abafundi bazafundiswa njalo lokubaza, ukunusela lokusebenzisa izikhumba.
“Inhloso yokuphakamisa abasakhulayo edolobheni lokuthuthukisa indawo ezisalele emuva kwezomsebenzi kazulu.
“Indawo le izakuba labafundi abavela e-Old Magwegwe, New Magwegwe, Pelandaba West, Pumula East and North, Magwegwe West leMagwegwe North, Lobengula West leNew Lobengula.”
Ikhansili ithe yananzelela ukuthi abasakhulayo baswela indawo lapho abangenza khona amabhizimusi emisebenzi yezandla, ngakho ikolitshi leli lizaphathisa kakhulu.
“Ukuguqula iMarisha Beer Garden isiba likolitshi kuzaphakamisa intsha yedolobho. Inengi labasakhulayo kumalokitshi aseduzane belingelayo indawo yokusebenzela. Lapha kuzakuba lithuba elihle lokuthi baziphakamise, babalekele ukusebenzisa izidakamizwa,” kutsho ikhansili.
