Online Reporter
YiNtatheli kaMthunywa
ZISAMANGELE izakhamizi zeMbare nanko zithe ngemva kwenkonzo yomngcwabo kaDavid Edgar Ndoro obesaziwa ngokutshaya ikatali, zethuka sezibona impahla zakhe zonke sezilumathiswe emlilweni.
UDavid Ndoro (72) utholakale esewonakele esambuzini semzini wakhe lapho abehlala khona yedwa.
UNdoro ubetshaya amakatali labahlabeleli abaziwayo ababalisa uThomas Mapfumo, Oliver Mtukudzi loMike Lanas phakathi kwabanye abanengi.
Okwethuse abantu yikuba odadewabo bakaNdoro — uOlivia, Florence kunye lo Elizabeth — badinga izakhamizi ezihlala eduzane bathi zitshise impahla zonke zomnewabo ezigoqela izigqoko, ingubo kunye lencwadi zakhe eziqakathekileyo.
Lokhu kwadabula umntakaNdoro owazalwa waba yedwa uOlivia owabonakala esezama ukukhipha ezinye impahla zikayise emlilweni ezigoqela iBhayibhili, kunye lamaphephandaba aqunyiweyo.
Umlilo lo ulokhu ulavuka, izakhamizi ziqale ukungunguna ngesizatho sesenzo lesi. Ukuthi kungani kutshiswe impahla zonke zikaDavid, kukanti ukwabiwa kwelifa lakhe kukhona ngoMgqibelo.
Kusitatimende, uOlivia Makombe, ongudadewabo kaDavid ucacise ngesenzo semuli lesi.
“Sicele omakhelwane ukuba basincedise ukuhlanza indlu, ukuwatsha ingubo kunye lempahla lokutshisa ezinye ebesezikhuntile njalo zinuka. Akukho okunuka santungwana ngesenzo lesi,” kuchasisa uMakombe.
Kodwa, ubuye wachothoza ibandla lapho obekukhonza khona umnewabo uDavid okwaba lomthelela empilweni yakhe.
“Inkolo yebandla lelo ibisenza uDavid angafuni ukuba lezihlobo ezikholwa okwehlukene laye.
“Ufe eyedwa, kakho obesazi, ngitsho lamalunga ebandla abengena lawo ebengazi ukuba usedlule emhlabeni.”
UDavid wacina ukubonakala mhlaka 8 Mfumfu esesontweni.
Ukungabonakali kwakhe kwezinye inkonzo ezilandelayo kwenza amalunga ebandla ayengena laye athinta abemuli, okuyikho okwenza kwatholakala isidumbu sakhe.
Abemuli bebesazi ukuba ulesifo senhliziyo kusukela ngomnyaka ka2020.
“Nxa konke kungahamba kuhle, sikhangelele ukwaba impahla zakhe ngoMgqibelo,” kutsho uMakombe esola inkolo yebandla leli ebeselimehlukanise labemuli.
UDavid ubekwe ngeviki ephelileyo emathuneni eGlenforest.
