Online Reporter
Nkosilathi Sibanda
NGOKUZALWA abazali bakhe bamnikeza amabizo athi Kevin Njabulo, lakanye ulethe injabulo lumdlali weScottland ngokuba phakathi kombango wesicoco seSoccer Star of the Year, ngesizini ka2025.
Bambalwa abathandabuza ukuthi uMoyo uzayithwala inkezo yengcitshi yazo zonke.
UKevin labanye bakhe abakukhalenda yeCastle Lager eka2025, bazakwethulwa eHarare ngoLwesihlanu ntambama. Kulumkhosi, yikho okuzabikwa ingqwele yabo bonke.
Kuzabuthanwa enzikini yalelidolobho kumcimbi ozahlanganisa osaziwayo kumdlalo kanobhutshuzwayo wakuleli.
Phezulu kwakho konke, abathandi labalandeli bomdlalo bazalinda ukuvulwa kwencwadi ezaveza igama lomdlali owedlule bonke kunye lomqeqetshi kuzwa ka2025. Ngokuhlaziya kweZimpapers Sports Hub langokuxoxisana labalandeli, isicoco se-Soccer Star of the Year sizaphiwa uKevin. Umdlali lo ubonakale eyikhokhela emuva, encedisana labanye ukuvala ngci, kwangabi lula ukuthi amanye amaqembu abhobozele egedini leqembu lakhe.
Labanye abalandeli bomdlalo bayakuvuma lokhu. Lisiya kunina ngoLwesihlanu, inkundla zokuxhumana zizabe zigcwale ngemibono ehlukeneyo ngokukhethwa komdlali owedlule bonke.
Uyise kaKevin, owake wadlala inguqu, uBishop Moyo utshele iZimpapers ukuthi kumele isicoco lesi siphiwe indodana yakhe.
“Ube lemidlalo emihle kulisizini. Bekudingeka umdlali oselesikhathi eside, olobugcitshi lolwazi njengaye,” kutsho uBishop.
Abadlali bakhethwe ngeviki edluleyo intatheli zihlangene labaqeqetshi labokaputeni bamathimu wonke akuPSL, bagoqela: Emmanuel Jalai (Dynamos), Tymon Machope (Scottland), Andrew Mbeba (Highlanders), Abubakar Moffat (MWOS), Kevin Moyo (Scottland), Washington Navaya (TelOne), Jarrison Selemani (FC Platinum), William Thole (Simba Bhora), Isheanesu Mauchi (Simba Bhora), Billy Veremu (MWOS) lo-Emmanuel Ziocha (Simba Bhora). Isicoco sikanozinti kukhangelelwe ukuthi siye kuWilliam Thole oweSimba Bhora. Ohlohle amabhola amanengi, uWashington Navaya uzathola eseGolden Boot, ngemva kokuhlohla amabhola angu-17.
Iqula lama-Soccer
Star of the Year 2025:
Emmanuel Jalai (Dynamos), Tymon Machope (Scottland), Andrew Mbeba (Highlanders), Abubakar Moffat (MWOS), Kevin Moyo (Scottland), Washington Navaya (TelOne), Jarrison Selemani (FC Platinum), William Thole (Simba Bhora), Isheanesu Mauchi (Simba Bhora), Billy Veremu (MWOS), Emmanuel Ziocha (Simba Bhora)
