Online Reporter
Zimpapers Sports Hub
UMDLALO wokucina phakathi kwamaWarriors leBafana Bafana kumqhudelwano we-Africa Cup of Nations ubuhlabusa kodwa waphinda waba lusizi kubalandeli bakuleli, abaphatheke kabi ngemva kokwehluleka kweqembu.
AmaWarriors aphume emqhudelwaneni engazange anqoba lomdlalo owodwa. Anqotshwe 3–2 kumdlalo wokucina kuqoqo likaB, owadlalelwa enkundleni yeMarrakech ngoMvulo.
IBafana Bafana iqale umdlalo igijima okuzwayo, ilibeke phambili kusebenza uTshepang Moremi otshayise ibhola kuDivine Lunga lagaxa entanjeni kwaba yi- 1–0 ngomzuzu wetshumi lasikhombisa.
AmaWarriors aphendule ngokuzimisela uTawanda Maswanhise, odlale kuhle kakhulu, ureyitshe abadlali abathathu wabeka ibhola phakathi kwamambule ngomzuzu wesitshiya galolunye, isimo salingana 1–1 kwaze kwafika ikhefu.
Kusigaba sesibili siqalise kukhokhela iBafana Bafana, ephinde yathola elinye ithuba lokuhlohla lapho uLyle Foster osebenzise iphutha likaDivine Lunga.
Kodwa, amaWarriors akazange alahle imbeleko. UMaswanhise wabhoboza watshaye ibhola elatshayelela udonga lwegedi. Akuhlalanga isikhathi, ngomzuzu wesi-74 kube ngu-Aubrey Modiba oweBafana Bafana ozibekele ibhola emambuleni ngesikhathi ezama ukuvimbela ibhola likaMaswanhise, kwaba yi 2–2.
AmaWarriors athole ithuba elihle lokuqeda umdlalo ngesikhathi sokucina, kodwa uMacaulay Bonne waphuthelwa ebhekane lonozinti uRonwen Williams.
Kudlule imizuzu embalwa iBafana Bafana yaphiwa umbekwa ngemva kokuthi ukaputeni wamaWarriors uMarvelous Nakamba ebambe ibhola ngesandla.
U-Oswin Appollis usukumele phezulu walithela emambuleni, yakhokhela iBafana Bafana ngomzuzu wesi-81. ISouth Africa iphumelele ukuyaphambili kuRound of 16 kunye leGipite. Kusele amaWarriors, iAngola eqede ikunombolo yesithathu.
Loba amaWarriors ephume engazange anqobe, bakhona abalandeli abakholwa ukuthi iqembu litshengise ukuzimisela.
