Online Reporter
Bhekimpilo Tshalibe
ABALIMI abafisa ukungena kubhizimusi yokulima ibilebile sebekhuthazwe ukuthi balilime khathesi ngoba yikho lapho elivuma khona.
Ibilebile yisilimo esithandwa ngamaNdiya kunye labanye abakuleli okwenza sibe lenzuzo kulowo osilimileyo.
UMnumzana Mdududzi Dube ongu-Agronomist kunkampani ye-AgriSeeds ukhuthaze abalimi ukuthi belime ibilebile ngoba lilenzuzo.
Uthe ibilebile kalihluphi ukulima njalo lilinywa ngesikhathi sokutshisa.
Uthe abanye bathanda ukulilima phakathi kwenyanga kaNcwabakazi loMpandula kodwa loba khathesi liyavuma.
“Sikhuthaza abalimi ukuthi baqale balungise umhlabathi wabo ulingane babe sebevula imibheda lapho abazahlanyela khona ibilebile labo.
“Ibilebile lifuna umhlabathi olivutshevutshe olobumunyu obuphakathi kwe-6.0 kusiya ku-6.5,” kutsho uMnu Dube.
“Sikhuthaza abalimi ukuthi nxa sebehlanyela benze imizila futhi bevule izikhala ezingaba yi-40 kusiya ku-60cm phakathi ukuze izilimo zabo zingakhuli ziminyene,” kutsho uMnu Dube.
Uthe ibilebile kalifuni kulinyelwa endaweni etshisa kakhulu.
“Sikhuthaza abalimi ukuthi belimele ibilebile endaweni okulomumo womkhathi ophakathi kwe- 25 kusiya ku-28 degrees celsius ngoba kalifuni umumo womkhathi ongaphansi kwe-10 le-12 degrees celsius,” kuphetha uMnu Dube.
