Online Reporter
Ethel Ncube
BEKUNGABIZWA ozwayo eBaseline Music Factory eMzansi Afrika lapho iNsimbi zeZhwane ebezibonga impilo kulabo abasinda engozini yomgwaqo kunye lokujabulela ilanga lokuzalwa kukaBrema.
Iqembu leNsimbi zeZhwane labakungozi yemota eyathatha impilo ezimbili zamalunga aleliqembu ngomnyaka ka2023 kuNcwabakazi. Abasindayo bayisitshiyagalombili kungakho bebebonga impilo kunye lokujabulela ilanga lokuzalwa kukaBrema.
Intatheli ixhumane lomaneja weNsimbi zeZhwane uBahlanu Sibanda obike ukuba umcimbi wabo uhambe kahle kakhulu.
“Kumcimbi lo besikhumbula umfowethu uBrema ngelanga lakhe lokuzalwa kunye lokubonga impilo zabobonke abafowethu abasalayo. Sibone kufanele ukuba sibonge njalo kuMdali ngokuba abanye bethu basala bephila.
“Kwababuhlungu silahlekelwa ngabafowethu u-Elvis loMaViri kodwa nje lamuhla sinakane ukuthi sikhumbule uBrema ngosuku lolu azalwa ngayo, sikhumbula njalo labo abasitshiyayo siphinde sibonge impilo kulabo abasalayo.
“Umcimbi lo ubuqukethe okunengi okugoqela njalo lokwethulwa kwedlalade elitsha. Idlalade lethu leli litholakala ebulenjini njalo lilesihloko esithi Kwelingafelwa nkonyane,” kutsho uBahlanu.
Uqhubekele phambili ebonga abalandeli ngomsebenzi abawenzayo.
“Sethula isibongo esikhulu kubalandeli bethu ababuye emcimbini wethu besitshengisa uthando.
“Sibonge labancendise ukuthi ilanga leli liphumelele sibuye sibonge lempilo kaBrema. Siyakubongela lokho lingadinwa liqhubekele lisisekela lihlala lisitshengisela uthando lwenu,” kutsho uBahlanu.
