admin
YiNtatheli kaMthunywa
AMAQEMBU ezemidlalo yenguqu eBinga asekhombise ukuthi sebebanengi abaphatheka kulumdlalo loba nje kusilela amagceke okudlalela kanye lempahla yomdlalo.
Omunye umqeqetshi kuligi kaDivision 2 ngaphansi kweligi yeZifa okhulume lephephandaba likazulu, uPride Sialumba, ubike ukuba abaphathi bakuleyo ndawo sebeqakathekisa imidlalo yenguqu ngokuncedisa ngezimali zokuthi kuqhutshwe limidlalo.
“Lapha eBinga sithanda ukubonga uDokotela Isaac Ndebele ngosekelo asesinike lona ukuze siqhube imidlalo yethu yenguqu.
“Inguqu iyadlalwa lapha eBinga njalo silamathimu amanengi afana labo Siabuwa United njalo adlalelwa ngabafana esibakhulisayo khonapha ezigabeni zethu,” kutsho uSiyalumba.
Kubikwa esabelweni seSiabuwa kuphela kulamathimu edlula alitshumi lambili adlala izinto ezikhanyayo njalo azimisele lawo ukuthi azithuthukise ngezemidlalo yenguqu.
“Esikukhangeleleyo kuhulumende okwamanje yikuthi asiphathise ngokuthi sikhulise ezemidlalo njalo abantwabethu kabala mpahla zokugqoka, ezifana lama- boots kanye lamabhola okukhaba,” kutsho uSiyalumba.
Kuzwakale ukuba abafana abavela endaweni ezikhatshana ezibalisela iManjolo kanye lezinye bayabuya ukuzodlala ibhola uma bengezwa nje ukuthi kulabanye abafana abalolongela imidlalo yenguqu.
“Thina sihlala sidlala imidlalo yokuqinisana lanxa kungela mali yokusithuthukisa njalo lokhu kwenza abafana bethu baqine,” kutsho uSiyalumba.
Online Reporter