admin
YiNtatheli kaMthunywa
UMDLALI weHighlanders uKnox Mutizwa uzayitshaya ayiphendulele iDynamos ngeSonto kumdlalo weligi yeCastle odibanisa amaqembu womabili eBarbourfileds koNtuthu.
UKnox nguye yedwa ongathi uyazi akwenzayo phambili kwenkundla kuqembu leHighlanders ngakho umthwalo usemahlombe akhe ukuthi iBosso inqobe kulumdlalo.
Phakathi kwabadlali bonke, uKnox nguye ongaliqonda igedi leDynamos engelavalo ngoba kuyithimu ayazi mhlophe ukuthi iyavuza kumvimbi lakunozinti wayo.
Umdlali lo uzangena eMagumeni umsila uphezulu ngemva kokuhlohlela iBosso mhla idibene labafana beMbare kumaviki amathathu adluleyo.
Umdali lo ubike ngokubobotheka ukuthi uzahlohla kumdlalo oqakathekileyo kumbali yenguqu yeZimbabwe.
Iphephandaba likazulu lixhumane loKnox kuliviki, yena othembise ukujabulisa ababukeli beTshilamoya ngokuligaxa emambuleni.
“Ukuhlohla yikho esikufunayo.Okumqoka yikunqoba. Singadlala kuhle kodwa nxa singahlohli akuncedi.Ngiyaphuma lelilodwa kuphela.
“IDynamos yithimu engatsho lutho ngoba iyahlohleka. Abalandeli benguqu abazibonela umdlalo wethu siseHarare bazavumelana lami ukuthi iDynamos iyanqobeka.
“Abadlali beDynamos bazazama ukulithela phakathi kodwa kwehlule ngoba mina labanye bami sizabopha ziqine.”
Uthe kasoke adanise abalandeli beHighlanders ngoba uyazi ukuthi amehlo abo athe mpo kuye.
“Ngiyazi ukuthi abantu bathembele kimi kulumdlalo,” nguKnox lo.
Imidlalo yeCastle kulimpelaviki:
Highlanders vs Dynamos ( Barbourfields).
Online Reporter