Online Reporter
Ethel Ncube
BEKUNGASIMUNTU, kulitshebetshebe likaTshangani lapho obekulezizalwane zeMalawi eZimbabwe International Trade Fair ngeviki ephelileyo, obaba labomama bedinga imithi esetshenziswa ensitha.
Imithi le, eyaziwa ngokuthi ngamatshuni ebilapho, bekugoqela eyabesilisa eqinisa amaqolo leyabomama ebenza bangathi zintombi nto.
UNkosikazi Mirrielle Nkata onguMqondisi wenkampani ye Me and Them, eyiyo ebithengisa imithi yensitha, uveze ukuthi abantu bakuleli labakwamanye amazwe akade bese-ZITF bebethakazelela imithi yabo.
“Inkampani yethu yenza imithi yesintu etshiyeneyo, eyelapha itshukela leminye imikhuhlane kanye lemithi esetshenziswa kwezocansi. Phakathi kwemithi esibuye layo kule iviki edingwa kakhulu ngeyensitha.
“Silomuthi okuthiwa ‘Dad Must Cry’, lowu nxa umama engawusebenzisa wenza izimanga. Usebenza khona kanye njengebizo lawo emacansini,” kuchaza uNkata.
Uqhubekele phambili esithi balomunye oyenza omama baphenduke babe zintombi nto.
“Silomuthi omama abalakho ukuwugcoba ensitha ubaphendule babe zintombi. Umuthi lo usebenza okwensuku eziyisikhombisa kungedlula lapho uyabuyela esimeni sakho. Injongo yemithi yethu le yikugcina imizi ngoba obaba abanengi baba labomama ngekhaya babuye babe labanye phandle,” kutsho uNkata.
“Kubobaba sibuye le-Bazooka. Lowu uyamvusa ubaba loba kuthiwa imizwa seyaphela. Angavele awunathe nje owesilisa loba esemdala kusuka kungathi lijaha.”
Uphethe ngokubonga usekelo abaluthola kubo bonke ababavakatshelayo eZITF minyaka yonke ngoba kuyikho okwenza ibhizimusi yabo ikhule.
“Sibonga kubo bonke abantu beZimbabwe abasivakatshelayo lapha eZITF, inhloso yethu yikugcina imizi ibambene.”
Kusenjalo, abezempilakahle baxwayisa abesifazane ukuthi bangafaki imithi yesintu kuzitho zabo zangasese ngoba kungenye yezizatho ezibangela ukuthi babe lemvukuzane yesibeletho.
