Online Reporter
Nkosilathi Sibanda
IQEMBU leHighlanders selibonge bonke abasekeli balo abahambe eGweru ukuyakhuza iqembu kumdlalo walo leTelOne ngoMgqibelo.
Kumbiko okhitshwe liqembu ngoMvulo ekuseni, iBosso ithe uthando lwabasekeli kaluqhubeke, njalo lukhuthaza abadlali, abaqeqetshi labakhokheli.
Abalandeli beHighlanders bafika bagcwalisa inkundla ye-Ascot kwabancane indawo. IBosso ithe ukugcwala kwemibala emnyama lemhlophe enkundleni kuphinde kwabonisa ukuthi kungani iHighlanders iqhubeka ibalelwa kumaqembu asekelwa kakhulu, ahlonitshwayo kunguqu yakuleli.
“Iqembu libonga ngobuqotho, ukwethembeka lokuzidela okutshengiswe ngabasekeli bayo,” kutsho umbiko.
Lanxa iqembu lincoma abasekeli balo ngokuma lalo ngazo zonke izikhathi, iphinde yakhumbuza wonke amalunga omdeni weBosso ngokubaluleka kokuziphatha ngendlela efaneleyo ngesikhathi kuhlatshelwa ingoma yesizwe.
“IHighlanders Football Club iyaziqhenya ngokuziphatha kwabalandeli bayo phakathi laphandle kwenkundla. Njengoba siqhubeka ngokunanza iminyaka engu-100, kasigcineni la amagugu njalo sibe yisibonelo esihle.”
