Online Reporter
Fungai Muderere
NGOMNYAKA ozayo, iHighlanders ifikisa iminyaka elikhulu lokhe yasungulwa ngo1926 njalo sekuhloswe ukuthi kwethulwe uhlelo lokuthakazelela umcimbi lo mhlaka 22 Mpalakazi.
Uluhlu lwenhlelo lezi lubikwe ngumgcinisihlalo webhodi yeqembu uLuke Mnkandla, ebika ukuba imuli yeHighlanders izajabula umnyaka ka2026 uze uyephela.
Amazwi kaMnkandla ayethulwe ngu-Elkanah Dube olilunga lebhodi ngoLwesithathu koBulawayo.
“Sihlele ukuthi sibambane lomphakathi, okuyikhona okuvela iqembu lethu. Inhloso yikuphakamisa abantu abasekela iqembu iminyaka yonke le, njengoba sesifika iminyaka elikhulu,” kutsho uMnkandla.
“Ekuthakazeleleni ikhulu leminyaka leHighlanders njengeqembu lenguqu, sifuna ukubambana lengatsha ezisebenza lomphakathi, amabhizimusi labanye abaxhasi. Lonke liyingxenye yembali yeHighlanders.”
Umgcinisihlalo webhodi yeHighlanders lo uthe kuzabaluleka ukuthi kuthuthukiswe iqula lamaqembu abasakhulayo, ukuze iqembu libe lesiqiniseko sokuthi lilekusasa elihle.
Ugcizelele lokuthi kuzamele baqine ngezakhiwo ezikhona, kudingwe abaxhasi abazimisele kulumsebenzi.
“Sidinga njalo abangasisekela ngemali kumisebenzi yethu emqoka kuzakhiwo zethu ezibalisela igymnasium, amahofisi lokunye okuphathelane lokumemethekiswa kwebizo leqembu. Umnyaka ozayo uzakuba mkhulu.”
UMnkandla uthe iqembu kuzamele likhule njalo kube lesidingo sokuthi basebenzise imitshina yakulezinsuku, iBosso ingasaleli emuva.
“Silungiselela iminyaka elikhulu le, sithanda ukwethula amathuba okubambana ukwenzela ukuthi imicimbi yethu isabalale ngomnyaka ozayo. IHighlanders akusiqembu lenguqu kuphela, lihlanganisa imuli, lisiko lomphakathi njalo luphawu olukhulu kumbali yeZimbabwe.
“Silinxusa lonke ukuthi liphatheke ekuthakazeleleni ukufikisa iminyaka elikhulu. Asisebenzeni sonke ukuthi umcimbi lo ubeyimpumelelo,” kutsho uMnkandla.
