Online Reporter
Fungai Muderere
INYATHELO leHighlanders lokwemba igolide kalisoze liphumelele ngesikhathi esifitshane, okutsho ukuthi inkokheli kumele ziqhubeke ngokuxoxisana leziphathamandla.
Ukuzwa udaba lokuthi iqembu leli lesulelwe ichence lokwemba kudanise amalunga alo akade esemhlanganweni we-Annual General Meeting (AGM) oqhutshwe ngeSonto enkundleni yeClubhouse.
IBosso yathola ichence lokwemba ngomnyaka ka-2022. Kusukela lapho, iqembu laqoqa ikomithi eyaphiwa umlandu wokubona ukuthi umsebenzi lo uyaphumelela.
Phakathi kwekomithi le kulamalunga ebhodi le-executive okubikwa balolwazi lwezokwenjiwa kwegolide. Okunye okwakumele bakwenze yikusungula lokubhalisa inkampani emba igolide.
“Ngo-2023 iqembu laqhubekela phambili lahlolisisa indawo lapho okulomgodi khona, kwenziwa uphenyo lomhlabathi, ngemva kwalokhu kwaqoqwa umbiko mayelana lalokhu. “Sakhetha umuntu esingasebenza laye kodwa inkokheli zala, ngesizatho sokuthi wabonakala engelungelanga lumsebenzi ngaleso isikhathi,” kutsho uMhlophe.
Uqhubeke wathi: “Sibe lomnyama ukuthi iziphathamandla zesula ichence lethu ngoba kwedlula isikhathi eside singenzi lutho. Ngokunjalo inkokheli zeqembu zizaqhubeka kungxoxo leziphathamandla ukuze kutholakale lelichence.”
Umgodi wegolide bekukhangelelwe ukuthi ubelusizo olukhulu kuHighlanders njengoba isiliqembu eseliphila ngokukhongozela.
Ukwemba igolide bekuzayinikeza imali, kuvuselelwe inhlelo ezinengi ezilokhe zimi ndawonye ngenxa yokoma kwesikhwama seqembu.
UMhlophe uchaze ukuthi iqembu lithola imali ethe xaxa eClubhouse nyanga zonke.
“Ubudlelwano bethu leClubhouse busesekhona njalo buqinile. Kulindawo kungena amalunga ethu kunye labo bonke abathanda iqembu,” kutsho uMhlophe.
Isivumelwano phakathi kweHighlanders lalabo abaqhuba inhlelo zebhawa lokunye eClubhouse sigxile ekuthini kumele iqembu lithole imali ethile nyanga zonke.
UMhlophe uthe isivumelwano lesi siyaqhubeka.
