Online Reporter
Nkosilathi Sibanda
IMIDLALO yeChibuku Super Cup iqala ngempelaviki ngemidlalo evuthayo, kodwa amehlo abalandeli bebhola likanobhutshuzayo koBulawayo azabe ekhangele kakhulu enkundleni yeBarbourfields, lapho iHighlanders ezahlangana khona leChicken Inn kusigaba sokuqala somncintiswano.
Amaqembu la angomakhelwane, ngakho kukhangelelwe ukuthi kube ngumdlalo onzima. Womabili asadalala kuligi yeCastle Lager, okuzenza umdlalo weChibuku Super Cup ube lithuba elihle lokuthi elinye livuselele ukuzethemba ngokunqoba.
IBosso izabe iphamblii kwabalandeli bayo, kodwa iChicken Inn layo izabe ifuna ukuphazamisa umkhosi weqembu ngokuphuma lempumela enhle.
IChibuku Super Cup izaqhubeka kuze kube mhlaka 28 Lwezi 2026.
Umlandeli weHighlanders, uDuduzo “Teekay” Ncube uthe balindele okungcono eqenjini ngemva kokunqobi kumidlalo edluleyo.
“Sifuna ukubona iHighlanders idlala ihlose ukuhlohlwa kulumdlalo, kusukela kumzuzu wakuqala,” kutsho uNcube.
“IChibuku Super Cup isinika elinye ithuba lokuthi siqale kutsha. Akukhathalisi ukuthi besingenzi kuhle kuligi, okubalulekileyo yikuthi sinqobe ngeSonto.”
Omunye umlandeli weBosso, uThemba Ndlovu ohlala eHwange uthe ukudlala eBarbourfields kungaba luncedo eqenjini.
“Abalandeli bazabe begcwele eBarbourfields, lathi sizasuka eHwange sizosekela. Abadlali kumele basebenzise ukubakhuthaza esizakwenza. Sifuna ukubona umoya wokulwa lokuzimisela,” nguNdlovu lo.
UCasper “SamaTwins” Siwela uthe ukunqoba iChicken Inn kungavuselela ithemba kubalandeli.
“Lo yiwo umdlalo lapho iqembu elingaguqula khona inhlanhla yalo. Ukunqoba iChicken Inn kungasivuselela ukuzethemba njalo kusinike ithemba lokuthi singafinyelela khatshana emncintiswaneni, njengoba kukhanya ukuthi kuligi ngeke sathwala inkezo njalo sisanda kukhitshwa kuMunhumutapa Cup.”
Kodwa, abalandeli beChicken Inn labo bathi iqembu labo lilamandla okuphuma lempumela engcono eBarbourfields.
Umlandeli weGamecocks, odume kakhulu, uMcCloud “Moyez” Moyo uthe iChicken Inn akumelanga ingene enkundleni isesaba iHighlanders.
“Siyazi ukuthi iHighlanders izabe isekhaya, kodwa lathi silamathuba. Imidlalo yenkezo iyatshiyana leyeligi njalo iqembu elizimiseleyo yilo elingadlulela phambili,” kutsho uMcCloud “Moyez” Moyo.
UGillian Chuma, ongomuye wequla elisekela iChicken Inn uthe: “Asikajabuli ngendlela iqembu ebelidlala ngayo, kodwa iChibuku Super Cup isingakutshintsha lokhu nxa umqeqetshi engakhalipha. Sifuna ukubona abafana bedlala ngenhliziyo.”
Umdlalo weHighlanders leChicken Inn ungomunye wemidlalo eyisitshiya galombili ezadlalwa esigabeni sokuqala kuChibuku Super Cup.
Umqhudelwano uzaqala ngoLwesihlanu, lapho iScottland ezadibana khona leFC Platinum eRufaro Stadium. NgoMgqibelo kuzadlala iMWOS le-Agama, iCAPS United leSimba Bhora kanye leNgezi Platinum Stars leZPC Kariba.
NgeSonto, ngaphandle kweHighlanders leChicken Inn, kuzadlala iDynamos leTelOne eRufaro, iHardrock leBulawayo Chiefs eChawadzwa, kanye leHerentals College leFC Hunters eNgoni.
Imidlalo yeChibuku Super Cup:
NgoLwesihlanu: Scottland v FC Platinum (Rufaro Stadium)
NgoMgqibelo: MWOS v Agama (Ngoni Stadium)
CAPS United v Simba Bhora (Rufaro Stadium)
Ngezi Platinum Stars v ZPC Kariba (Baobab Stadium)
NgeSonto: Dynamos v TelOne (Rufaro Stadium)
Hardrock v Bulawayo Chiefs (Chawadzwa Stadium)
Herentals College v FC Hunters (Ngoni Stadium)
Highlanders v Chicken Inn (Barbourfields Stadium)
