Online Reporter
Nkosilathi Sibanda loFungai Muderere
KUSEGCEKENI, akufihleki njalo kuliqiniso ukuthi iHighlanders leDynamos lonyaka ngamaqembu aphelekezele amanye kumkhankaso weligi yeCastle Lager Premiership.
Akukho okuhle okungakhulunywa ngamaqembu la ngoba ehluleke ukujabulisa inengi labalandeli bawo enkundleni.
Aphenduke aba ngamaqembu ngebizo nje kuphela. Ukunqoba lokubusa kuligi enkulu sekuyinganekwane, indaba yakudala.
Kodwa ngokwehluleka ukuthi adlale kuhle kuPSL, amathimu la “asecatshe” kumkhankaso wenkezo yeChibuku Super. Zombili zenelise ukuthi khoxo kusigaba sama-quarter final njalo abalandeli labathandi bomdlalo bangalangazelela ukuzibona zidibana ku-final.
Amaqembu amathathu iDynamos, Highlanders leTriangle asefinyelele kusigaba sama-quarter final eChibuku Super Cup.
IDeMbare yanqoba inkezo le ngomnyaka ka2023 lo2024 ngemva kokuba iBosso leTriangle ziyinqobe ngo2019 lango2018 ngokulandelana kwazo. Amaqembu womathathu la ahlanganiswe kusigaba sama-quarter-final leZPC Kariba, Bikita Minerals, Scottland FC, MWOS kunye leManica Diamonds.
udaba lluyaqhubeka ebulenjini
Lonyaka, lokhe kuqalise umqhudelwano, sekube labadlali abayisitshiya galolunye abahlohle phakathi komdlalo.
Abadlali laba nguTineyi Tsimba (Bikita Minerals), Felix Hammond (Dynamos), Nigel Matinha, Arthur Banda (MWOS), Moses Shidolo (Scottland), Boid Mutukure (Simba Bhora) Frank Makarati (TelOne), Ali Sadiki (Triangle) loMason Mushore (Highlanders).
USadiki wahlohla lapho iTriangle inqoba iKwekwe United 1-0. UTsimba loMakarati bahlohla lapho iBikita Minerals idlala ngokulingana leTelOne, kumdlalo owanqotshwa yizimbamgodi zeBikita kumbekwa nge 5-4.
Umdlali weDynamos, uHammond, wadubula umambule, kuhlangothi lweSimba Bhora, kwahlohla uMututure. Zombili zehlukaniswa ngombekwa, iDeMbare inqoba nge 4-3. Abadlali beMWOS uBanda loMatinha bahlohla amabhola akhipha iCAPS United emkhankasweni, kusiba yi 2-0. UShidolo wabeka iScottland emalini, ehlohla phezulu kweGreenfuel.
Enkambeni yeHighlanders, ingqwele kwaba nguMushore, owalidonsa ibhola kuyi-free kick, wachumisa abafana besikolo iHerentals, kusiba yi 1-0.
Kuhlandla lama-quarter finals, iHighlanders izadlala leScottland, iDeMbare idibane leZPC Kariba. IManica Diamonds ingqikilana leTriangle.
Kusenjalo, iyaqhubeka imidlalo yeligi yeCastle Lager.
Imidlalo yeCastle Lager Premiership ngeviki lesi-28:
TelOne v MWOS (Ascot), Chicken Inn v Kwekwe United (Luveve), Manica Diamonds v Grenfuel (Sakubva), Simba Bhora v Scottland (Wadzanayi), Herentals v caps United (Rufaro), ZPC Kariba v Ngezi Platinum Stars (Nyamhunga), FC Platinum v Highlanders (Mandava), Yadah FC V Bikita Minerals (Heart Stadium)
