Online Reporter
Nkosilathi Sibanda
INTSHA yakoBulawayo lakundawo eziseduzane izathola imisebenzi lokuguqula impilo kwelingcono kulandela ukwethulwa kohlelo lokwakhiwa kwefekithali yokupheka utshwala yinkampani yeDelta Corporation, eBelmont koBulawayo.
Inkampani le, ibike ukuba loba amanye amankampani ebaleka koNtuthu esiya eHarare, yona kayisoke ilandele lokho ngoba ihlose ukuthi ibe yinsika yokuvusa uBulawayo, ikhokhele ekuthuthukiseni umkhonomi walelidolobho, kunye lempilakahle yabantu.
Ngokutsho kukamgcinisihlalo webhodi yenkampani, uMnumzana Todd Moyo, iDelta Corporation izimisele ukwakha ifekithali koBulawayo, ngemali engange US$35 miliyoni.
Uthe ukuzimisela kweDelta Corporation koBulawayo kuvela ekuthini yikho lapho okwaqala inkampani le ngeminyaka yama-1950s.
UMnu Moyo uthe ifekithali le izaphakamisa idolobho, ivuselele amabhizimusi, ivule amathuba emisebenzi.
Ukwakhiwa kwali fekithali kwethulwe emphakathini ngeviki edluleyo, lapho uMnu Moyo akade engumhlonithswa khona, elomsekeli kaSodolobho wakoBulawayo ukhansila, Edwin Ndlovu.
“Isakhiwo esethulwa lapha sisixhumanisa lembali yethu kusukela ngo-1950. Lapha kasikhulumi ngotshwala kuphela, sikhuluma ngokuvula amathuba emisebenzi lokuphakamisa umphakathi.
“Amathuba emisebenzi azavuleka ekwakheni, lakho konke okuzasekela lumsebenzi wefekithali entsha lapha eBelmont, okuyikho okwaba yisiqalo salinkampani,” kutsho uMnu Moyo.
Kukhangelelwe ukuthi kuvulwe imisebenzi eminengi kulabo abazakwakha kunye labazancedisa. UMnu Moyo uthe iDelta Corporation izafuna ukuthi imisebenzi le yenziwe ngabantu kunye lamankampani akoBulawayo lalabo abaphuma kundawo eziseduzane.
IDelta Corporation ibalelwa kumankampani aphezulu kuleli, aphathisa kakhulukazi kumkhonomi welizwe, nanko kubikwa ibhadala umthelo ophezulu kwe-US$20 miliyoni ngenyanga.
Isicelo esibekwe nguMnu Moyo yikuthi ikhansili yakoBulawayo iqakathekise ukutholakala kwamanzi.
“Sicela ukuthi ikhansili yakoBulawayo isincede ngamanzi njengamabhizimusi lomphakathi. Idamu leShangani leleGlassbock, lamachibi aseNyamandlovu abalulekile kakhulu koBulawayo lokukhula kwendawo eziseduzane.”
“Ngesikhathi amanye amabhizimusi ekhethe ukuya eHarare, thina njengeDelta Corporation kasiyindawo, sizahlala lapha koBulawayo. Sifuna ukuba yingxenye yokuvuselela uBulawayo ngoba yikho lapho esasungula khona. UBulawayo kumele akhule, abizwe njengendawo yamafekithali njengakudala.”
