Online Reporter
Nkosilathi Sibanda
I-GIFFORD Boys High School isizibeke njengentshantshu zebhola lenyawo labadlali abangaphansi kweminyaka engu-20 ngemva kokunqoba iRio Tinto 4-3 emdlalweni wokucina we-Orap Zenzele Isuzu Champions Cup.
Iqembu leli, eliqeqetshwa nguChengetai Manjengwa lithwale isicoco ngemva komdlalo oqinileyo ophele kungela amabhola ahlohliweyo ngesikhathi esijwayelekileyo, kwasekusetshenziswa imbekwa ukwehlukanisa amaqembu womabili.
Ukunqoba lokhu kuqinise isithunzi seGifford High njengelinye lezikolo eziqhubeka ziveza abadlali abalethalenta ezabelweni zeMatabeleland.
Emdlalweni wokucina, abadlali babonise ukuzimisela.
Umncintiswano lo ubungowesitshiya galolunye njalo uhlanganise izikolo eziyisitshiya galombili ezigoqela iGifford High, Rio Tinto, Guinea Fowl High, Magwegwe High, Tsholotsho High, Somvubu High, Tongwe High kanye leZezani High.
IRio Tinto yafika kowokucina ngemva kokutshaya iTongwe High, kuthi iGifford High yanqoba iGuinea Fowl High kuma-semi-final. Kumdlalo wamankazana, iSomvubu High yathwala isicoco ngemva kokwehlula iChaplin High emdlalweni wokucina, okutshengise ukuthi lonyaka umncintiswano ubulokuncintisana okukhulu kuzo zombili izigaba.
I-Orap Zenzele Isuzu Champions Cup iqhubeka isiba yindawo yokukhulisa ithalenta labadlali abasakhulayo, abanengi babo abacina sebemela amaqembu ePremier Soccer League lamaqembu esizwe ezigabeni ezitshiyeneyo.
Ngaphandle kokuncintisana, umqhudelwano lo uqhubeka ukhuthaza imfundo, ukuziphatha okuhle lokubambisana phakathi kwezikolo, njalo unika abatsha ithuba lokubonwa ngabaqeqetshi labahloli bamathalenta.
