Online Reporter
Yintatheli kaMthunywa
ABAQOQA umcimbi we-Mayor’s Christmas Cheer Fund babika ukuba amalungiselelo asesezingeni eliphezulu. Lonyaka umcimbi, uzaqhutshelwa eMount Cazalet Lodge eGwanda.
Umcimbi lo uzaqhutshwa ngoLwesine kuyonale iviki. Lonyaka kukhangelelwe ukuqogelelwa imali engange USD$ 10 000.
Umcimbi lo uyabe ungowokuqogelela imali, ukudla, impahla, izipho ezizancedisa umphakathi weGwanda. Ekuqaleni bekuncediswa abantwana besikolo ogogo labo khulu, abasedolobheni leGwanda.
Umgcinisihlalo weGwanda Mayor’s cheerfund uMnumzana Methusi Moyo uthe lonyaka bakhangelele ukuthola inzuzo ethe xaxa ukuze benelise ukwelula isandla ebantwini abanengi.
“Sikhangelele ukuthi sithole izandla ezilula ukuze senelise ukunceda inani labantu abanengi lonyaka. Ekuqaleni besincedisa abafundi abambalwa ukuba babhadalelwe imali zesikolo, kanye lokuncedisa ogogo labokhulu abahlala edolobheni lethu. Sifisa ukuba osomabhizimusi, amaJahunda, abemba ilitshe eliligugu, abalimi aknye lamankampani besixhase kuhambo lwethu,” kubika uMoyo.
Luyaqhubeka ebulenjini udaba
Abantu bazabelwa impahla lezi, ukuze bethole ikhisimusi elifana lelomuntu wonke. Umcimbi lo uhlose ukuncedisa abantu abaswelayo labangela mandla okuzincedisa.
Usodolobho weGwanda uThulani Moyo uthe umcimbi lo ukhangelelwe ukuncedisa abantu abadlula amakhulu amabili.
“Sifisa ukuncedisa abantu abadlula amakhulu amabili, okhulu labogogo abahlala eOld People’s Home, abantwana besikolo. Ikhomithi izancedisana lengatsha ezikhangele abantu abampofu lomphakathi weGwanda ukuze impahla lezi ziyebantwini abaqondileyo.
“Sikhangelele ukuqogelela imali efika USD $10 000. Imali le, izanza umahluko edolobheni lethu asifuni kutshiya abanye ngemuva,” kubika uMoyo.
