Online Reporter
Ethel Ncube
KULENDODA yeGokwe egwetshwe iminyaka engu-60 isetheswa icala lokudlwengula umntwana oleminyaka engu-9. Icala leli lahlulelwe ngeviki ephelileyo eGokwe.
Umetheswacala uleminyaka engamatshumi ayisithupha lanye (61), wayehlala emzini oseduze lomntwana owadlwengulwayo endaweni yenduna uNjelele, eGokwe.
Umntwana ubehlala labazali bakhe. Umntwana lo wadlwengulwa kathathu ngesikhathi abazali bakhe bengekho ekhaya.
Isihluku lesi siqale mhlaka 24 Nhlolanja 2026. Ngalolosuku, umntwana watshiywa ekhaya lomfowabo oleminyaka emihlanu (5) ngesikhathi abazali besemasimini. Umsolwa wathatha ithuba walanda umntwana wamkhohlisa wamhambisa emzini wakhe lapho amdlwengula khona. Wamethusela ngokuthi uzamlimaza nxa engaveza udaba lolu.
Umsolwa waqhubeka ngesihluku lesi okwesibili ngesikhathi abazali bephinde baya emasimini. Kuhlandla lesithathu, wabanjwa edlwengula umntwana ngunina womntwana owafika ekhaya evela emasimini.
Udaba lwabikwa eZRP Gokwe, kwalandela ukubotshwa komsolwa kanye lokumiswa kwakhe phambi komthethwandaba.
Intatheli ixhumane lesikhulumi samapholisa eMidlands uInspector Emmanuel Mahoko oveze ukuba isenzo lesi sibi njalo wazisa uzulu ngokugwetshwa kukamsolwa,
“Kulandela ukubotshwa komuntu owadlwengula umntwana eGokwe kathathu sithanda ukwazisa uzulu ukuba umsolwa usegwetshiwe, uzapika iminyaka engu-60 esejele.
“Amapholisa akhumbuza uzulu ukuthi, iSigaba 65 somthetho weCriminal Law (Codification and Reform) Act, Chapter 9:23 sichaza ukuthi icala lokudlwengula elenziwa nxa owesilisa esenza ucansi lowesifazana engavumanga, njalo esazi ukuthi lo wesifazana kavumanga loba ebona ukuthi kungenzeka ukuthi kavumanga.
Nxa etholakala elecala, umsolwa angagwetshwa ukuphila kwakhe konke ejele loba isikhathi esithile,” kuphetha uMnu Mahoko.
